Հեղինակ և վարող՝ Հայկ Համբարձումյան 
ԹԵՄԱՅԻ հյուրերն են մշակույթի գործիչներ, հոգևորականներ, ճանաչված ռեժիսորներ ու դերասաններ, Հայաստանում և արտերկրում ապրող և աշխատող հայ և օտարազգի գիտնականներ, հայագետներ, երիտասարդ մասնագետներ, գրողներ, լրագրողներ:
Որքանո՞վ են ժամանակակից հայ արվեստն ու գրականությունը հարաբերվում համաշխարհային արվեստի զարգացման միտումներին: Հայագիտական ի՞նչ նոր ուսումնասիրություններ են կատարվում Հայաստանում ու Սփյուռքում: Մեր օրերի արվեստը կրթում է, թե՞ զբաղեցնում:  Այս և այլ հարցադրումները հնչում ու պատասխաններ են ստանում ԹԵՄԱՅԻ  տաղավարում:
Պարբերականությունը՝ ամեն ուրբաթ, ժամը 21:50-ին
Կրկնությունը՝ շաբաթ օրը, ժամը  13:30-ին

Հանդուրժողականությունն ու անհանդուրժողականությունը հայ գրականության մեջ


Հանդուրժողականությունը այլ ազգության կամ կրոնական պատկանելության, աշխարհայցքի, կենսակերպի, վարքի ու ավանդույթների նկատմամբ հարգանքի կամ համբերանքի արտահայտություն է: Թե որքանով ենք մենք՝ հայերս հանդուրժող, տարբեր կարծիքներ կան: Հանդուրժողականության թեման հետաքրքիր դրսևորումներ է գտել հայ գրականության մեջ: Հանդուրժողականության ու անհանդուրժողականության տարբեր դրսևորումների մասին Հայկ Համբարձումյանը զրուցել է «Եվրասիա համագործակցություն» հիմնադրամի տնօրեն, հրապարակախոս Գևորգ Տեր-Գաբրիելյանի հետ:

Հայ-բրիտանական գրական-երաժշտական կամուրջ


Վերջերս Երևանում կայացավ հայ-բրիտանական միասնական համերգ, որտեղ հնչեցին բրիտանացի ժամանակակից կոմպոզիտորների՝ հայ դասական բանաստեղծությունների հիման  վրա ստեղծված գործեր: Ինչպե՞ս ստեղծվեց գրական-երաժշտական այդ կամուրջը, ի՞նչ են տալիս այդպիսի համագործակցությունները մեր երիտասարդ կոմպոզիտորներին, Հայաստանում իրենց ներուժի իրացման ի՞նչ հնարավորություններ ունեն մեր երիտասարդ երաժիշտները: Այս հարցերի շուրջ Հայկ Համբարձումյանը զրուցել է կոմպոզիտոր, դաշնակահար Արփինե Կալինինայի հետ:

Գրաբարի հմայքն ու արդիականությունը


Հայ միջնադարյան հարուստ գրական ժառանգության և, ընդհանրապես, մշակույթի նկատմամբ հետաքրքրության խթանման գործում կարևոր նշանակություն ունի գրաբարի դասավանդումն ու ներկայացումը: Միջնադարի հայ գրականությունը լայն հանրությանն անհասանելի է, քանի որ գրաբարը մեծ մասամբ չի դասավանդվում դպրոցներում: Ինչպե՞ս երեխաների և ուսանողների մեջ հետաքրքրություն առաջացնել գրաբարի նկատմամբ, ինչպե՞ս դասավանդել այն այսօր: Այս հարցերի մասին Հայկ Համբարձումյանը  զրուցել  է լեզվաբան, ԵՊՀ դոցենտ Նորայր Պողոսյանի հետ:

Շնորհավոր Նոր տարի և Սուրբ Ծնունդ


Ինչպե՞ս են հավատացյալները դիմավորում Նոր տարին և տոնախմբում Սուրբ Ծնունդը: Ինչպե՞ս պետք է ամփոփել և սկսել տարին: Ի՞նչ սպասելիքներ կան նոր` 2018 թվականից: Ինչպիսի՞ն է 2018 թվականի եկեղեցական օրացույցը: Այս հարցերի, ինչպես նաև եկեղեցական տոների առանձնահատկությունների, խորհրդի ու նշանակության մասին Հայկ Համբարձումյանը զրուցել է Տ. Շավարշ քահանա Սիմոնյանի հետ: 

Հայկական էպիկական ավանդույթն ու մեր ինքնությունը


Ե՞րբ և ինչպե՞ս են ստեղծվել հայ էպիկական բանահյուսության հայտնի ստեղծագործությունները՝ «Պարսից պատերազմ», «Տարոնի պատերազմ» ավանդավեպերն ու «Սասնա ծռեր» էպոսը, ինչպե՞ս են դրանք արտացոլում հայ ժողովրդի պատմությունը, ինքնության տարբեր դրսևորումներն ու աշխարհայացքը: Այս հարցերի շուրջ Հայկ Համբարձումյանը զրուցել է բանասիրական գիտությունների դոկտոր Արմեն Պետրոսյանի հետ:

Հայ ժողովրդի ծագումը


Հայ ժողովրդի ձևավորման ժամանակի, ընթացքի, ժառանգորդության, ինքնության, դրանց հետ կապված պատմական, լեզվաբանական, մշակութային բազում հարցեր մշտապես եղել են հայագիտության ուշադրության կենտրոնում և այսօր էլ վեճեր են հարուցում: Կան տարբեր աղբյուրներից սնվող տարբեր տեսակետեր՝ գիտական-ակադեմիականից մինչև ազգայնական-զգացմունքային, հայաստանյան հայագիտութան և արտասահմանյան, ի վերջո ավելի ընդհանուր պրիմորդիալիստական և մոդեռնիստական: Հայ ժողովրդի ծագման բարդ ու ընդգրկուն խնդիրների շուրջ Հայկ Համբարձումյանը զրուցել է բան. գիտ. դոկտոր Արմեն Պետրոսյանի հետ:

Մարդն առանց հատկությունների. Մուզիլից՝ Չարենց


Ինչպե՞ս է քաղաքակրթության զարգացումն անդրադառնում մարդու վրա, ինչպիսի՞ն է կայսրության փլատակների տակ մնացած մարդու ճակատագիրը: Ինչո՞ւ է քաղաքական, տնտեսական, սոցիալական բուռն տեղաշարժերի մեջ անհատը տրոհվում, կորցնում ինքնությունը, ոչնչանում: Ո՞վ է մարդն առանց հատկությունների: Այս հարցերը լայնորեն քննարկվում են 20-րդ դարի արևմտյան գրականութան, մասնավորապես, Ռոբերտ Մուզիլի «Մարդն առանց հատկությունների» ստեղծագործության մեջ: Այս հարցերի շուրջ Հայկ Համբարձումյանը զրուցել է գրականագետ, թարգմանիչ, բանաստեղծ  Աշոտ Ալեքսանյանի հետ:

Ֆրանսահայ գրականություն


Ֆրանսահայ գրականությունն, իր հայտնի անուններով՝ Շահան Շահնուր, Զարեհ Որբունի,  Վազգեն Շուշանյան, Նիկողոս Սարաֆյան և այլք, տարբերվում է հայկակական այլ համայքներում ձևավորված գրականությունից: Ֆրանսահայ գրողները հակադրվելով սփյուռքի ավանդական թեմաներին՝ իրենց ստեղծագործություններով բերում են իրականության ընկալման ու արտացոլման այլ եղանակներ, պատմական անցյալի նկատմամբ նոր վերաբերմունք: Ինչպե՞ս է ձևավորվել գրական այս շարժումը, ի՞նչ առանձնահատկություններ ունի ֆրանսահայ գրականութունն ընդհանրապես: Այս հարցերի մասին Հայկ Համբարձումյանը զրուցել է գրող, գրականագետ, Գրիգոր Պըլտյանի հետ:
 

Հայ օպերան և օպերային արվեստի զարգացման արդի միտումները


Արդի աշխարհում, ժամանցի ու զվարճանքի միջոցների բազմազանության մեջ, գնալով դժվարանում է օպերային արվեստի նկատմամբ հետաքրքրություն առաջացնելն ու պահելը: Արտասահմանյան հայտնի թատրոններում վաղուց արդեն այլ խայծեր ու միջոցներ են օգտագործում հանդիսատեսին թատրոն բերելու համար. ներկայացումները արդիականցվում են, դերասանները մերկանում և այլն: Մյուս կողմից օպերան մեծամասշտաբ ու ծախսատար ժանր է և հաճախ կարող ենք լսել, որ փոքր երկրները չեն կարող իրենց թույլ տալ օպերային մեծ ներկայացումներ: Ինչպե՞ս են մեր օպերային թատրոնում դիմագրավում նոր մարտահրավերներին, ի՞նչ ծրագրեր ու ներկայացումներ են սպասվում: Այս հարցերի մասին Հայկ Համբարձումյանը  զրուցել է Տ. Չուխաջյանի անվան միջազգային ինստիտուտի հիմնադիր տնօրեն, ռեժիսոր, դերասան Ժիրայր Փափազյանի հետ: 

Գրքի երևանյան փառատոն


Երևանում մեկնարկեց Գրքի երևանյան առաջին փառատոնը, որի նպատակն է հայ ժամանակակից գրականության հանրայնացումը,  նոր հրատարակությունների ներկայացումը, գրող-հրատարակիչ, գրող-ընթերցող կապերի խթանումը: Այս խնդիրները մշտապես քննարկվում են գրական-հրատարակչական շրջանակներում, սակայն տարիներ շարունակ շատ հարցեր այդպես էլ չեն լուծվում: Ինչպե՞ս փառատոնը կնպաստի այդ խնդիրների լուծմանը, որքանո՞վ է փառատոնային ձևաչափը հարմար գրականության ներկայացման համար, ո՞վ և ինչպե՞ս պետք է հանրայնացնի գիրքը: Այս հարցերի մասին Հայկ Համբարձումյանը զրուցել է Մշակույթի նախարարության գրական ծրագրերի համակարգող Արմեն Սարգսյանի հետ: 

Հայ միջնադարյան գրականության հմայքը


Հայ միջնադարյան գրականությունն իր ժանրային բազմազանությամբ, պատմական, բանահյուսական, գեղարվեստական, հոգևոր շերտերի յուրօրինակ համադրությամբ կարծես թե լավ ուսումնասիրված և ուսումնասիրվում է, դասավանդվում է ԲՈՒՀ-երում: Նկատելի է, սակայն, որ մասնագիտական ֆակուլտետների ուսանողները դժվարությամբ են հաղթահարում նյութի դիմադրությունը և հետագայում շարունակելով իրենց գործունեությունը գրականագիտության մեջ՝ հազվադեպ են որպես հետազոտության նյութ ընտրում այդ ոլորտը: Ինչո՞ւ է այդպես, հայ միջնադարյան գրականության դասավանդման և ուսումնասիրության ի՞նչ դժվարություններ կան: Այս հարցերի մասին Հայկ Համբարձումյանը զրուցել է բանասիրական գիտությունների դոկտոր, պրոֆեսոր Վազգեն Սաֆարյանի հետ:

Չարենցի ժամանակը


Եղիշե Չարենցի անձի ու ստեղծագործութան բազմաթիվ խնդիրներ թեև մշտապես գրականագետների ուսումնասիրության շրջանակում են, սակայն մինչ վերջերս չկար փիլիսոփայական անդրադարձ Չարենցին, երբ խոշոր անհատը ներկայացվում է պատմության ու ժամանակի հետ առերեսման, ինքնահաղթա¬հարման, պատմության նկատմամբ քննադատական վերաբերմունքի համատեքստում: Հայկ Համբարձումյանը զրուցել է փիլիսոփա, «Չարենցի ժամանակը» մենագրության հեղինակ Աշոտ Ոսկանյանի հետ: