Հեղինակ և վարող՝ Հայկ Համբարձումյան 
ԹԵՄԱՅԻ հյուրերն են մշակույթի գործիչներ, հոգևորականներ, ճանաչված ռեժիսորներ ու դերասաններ, Հայաստանում և արտերկրում ապրող և աշխատող հայ և օտարազգի գիտնականներ, հայագետներ, երիտասարդ մասնագետներ, գրողներ, լրագրողներ:
Որքանո՞վ են ժամանակակից հայ արվեստն ու գրականությունը հարաբերվում համաշխարհային արվեստի զարգացման միտումներին: Հայագիտական ի՞նչ նոր ուսումնասիրություններ են կատարվում Հայաստանում ու Սփյուռքում: Մեր օրերի արվեստը կրթում է, թե՞ զբաղեցնում:  Այս և այլ հարցադրումները հնչում ու պատասխաններ են ստանում ԹԵՄԱՅԻ  տաղավարում:
Պարբերականությունը՝ ամեն ուրբաթ, ժամը 21:50-ին
Կրկնությունը՝ շաբաթ օրը, ժամը  13:30-ին

Ժամանակակից թանգարան. ինչո՞ւ և ինչպե՞ս


Ժամանակակից աշխարհում փոխվում է նաև թանգարանի ընկալումը: Դրանք չեն ընկալվում միայն որպես պատմական ու մշակութային ցուցանմուշների պահպանության, ցուցադրության ու ուսումնասիրության վայր, այլև հավակնում են ավելի մեծ սոցիալական ու մշակութային գործառնականության: Որքանո՞վ է այս մոտեցումն արդարացված, որքանո՞վ  են հայաստանյան թանգարանները պատրաստ ու բաց փոփոխությունների առջև, ի՞նչ է անհրաժեշտ թանգարանների զարգացման համար: Այս հարցերի մասին Հայկ Համբարձումյանը զրուցել է Ե. Չարենցի անվան գրականության և արվեստի թանգարանի տնօրեն Կարո Վարդանյանի հետ:

Կինոարտադրության զարգացման հեռանկարներն ու խութերը


Կինոգործիչները բարձրաձայնում են հայկական կինոյի յուրահատուկ տեսակի բացակայության և դրա ստեղծման անհրաժեշտության մասին: Ի՞նչ միջոցներով պետք է խթանել հայկական կինոյի զարգացումը, ինչո՞վ կարող է հայկական կինոարտադրությունը հետաքրքիր դառնալ ներդրողների համար, ինչու՞ չկա կինոարտադրության զարգացման ծրագիր: Այս հարցերի մասին Հայկ Համբարձումյանը զրուցել է պրոդյուսեր Մելիք Կարապետյանի հետ: 

Սուրբ Հարության խորհուրդը մեր կյանքում


«Քրիստոս հարյավ ի մեռելոց, օրհնյալ է Հարությունը Քրիստոսի»: Այս ողջույնն է հնչում հայ առաքելական բոլոր եկեղեցիներում այսօր: Սուրբ Հարության ճրագալույցի պատարագով ավարտվում է Հիսուս Քրիստոսի երկրային կյանքի վերջին օրերն ու գործերը խորհրդանշող Ավագ շաբաթը: Բոլոր հավատացյալների և հատկապես պահեցողության մեջ գտնվողների համար այս շաբաթն առանձնահատուկ նշանակություն ունի: Ավագ շաբաթվա և այն եզրափակող Սուրբ Հարության տոնի խորհրդի մասին Հայկ Համբարձումյանը զրուցել է Նշան քահանա Ալավերդյանի հետ:

Երիտասարդական կինոալիք


Թեև Հայաստանում տեղի ունեցող կինոիրադարձություններին մշտապես մասնակից են երիտասարդները, կան երիտասարդական կինոփառատոններ, սակայն ինչպես գրեթե բոլոր ոլորտներում, երիտասարդները շատ ավելի քիչ հնարավորություններ ունեն իրացնելու իրենց ծրագրերը, ֆինանսավորում ստանալու պետության կողմից և մրցակցելու ավագների հետ: Հայկ Համբարձումյանը զրուցել է կինոռեժիսոր Խանե Պողոսյանի հետ:

Կինը և պոեզիան


Ի՞նչ առանձնահատկություններ ունի կանանց պոեզիան, որքանո՞վ է արդարացված տղամարդկանց ու կանանց բանաստեղծության տարբերակումը: Ի՞նչ է ակնկալում հայ ընթերցողը ժամանակակից բանաստեղծությունից և որքանո՞վ է հայ արդի պոեզիան արծարծում ընթերցողին հուզող խնդիրները: Այս հարցերի մասին Հայկ Համբարձումյանը զրուցել է բանաստեղծուհի Նոնա Պողոսյանի հետ: 

Հայոց լեզու՝ կանոնակարգված ու կանոններից ազատ


Ժամանակակից հայերենի բառակերտման, տերմինաբանության, տառադար¬ձության, ուղղագրության, ուղղախոսության, կետադրության, բանավոր և գրավոր խոսքում կիրառության բազում խնդիրներ մշտապես քննարկումների առարկա են և վեճեր են հարուցում: Այս խնդիրների քննարկման, համակարգման, խորհրդատվության նպատակով է ստեղծվել «Հայերենի բարձագույն խորհուրդը»: Ինչպե՞ս է խորհուրդը իրականացնելու այդ աշխատանքը, ի՞նչ գործառույթներ ունի և ի՞նչ միջոցներով ու լծակներով են լեզվի հետ կապված որոշումները իրականություն դառնալու: Այս հարցերի մասին Հայկ Համբարձումյանը զրուցել է ԵՊՀ հայոց լեզվի ամբիոնի վարիչ, բանասիրական գիտությունների դոկտոր, պրոֆեսոր Յուրի Ավետիսյանի հետ: 

Արդի պատմագիտություն. հասարակական պատվեր և գիտականություն


Խորհրդային մարքսիստական պատմագիտությունը իշխող գաղափարախոսության պահանջով աղավաղումներով է ներկայացրել հայոց պատմությունը և միակողմանի՝ համաշխարհային պատմության շատ հարցեր: Թվում էր, թե հետանկախության շրջանում հնարավորություն կա նորովի, նոր ու ժամանակակից մեթոդներով, քաղաքական ու  գաղափարական սահմանափակումներց ազատ լուսաբանել պատմությունը: Ի՞նչ հարցերով է հետաքրքրվում հայ արդի պատմագիտությունը, ի՞նչ մեթոդներ է օգտագործում, որքանո՞վ է ընդհանրապես արդի պատմագիտությունը օբյեկտիվ: Այս հարցերի մասին Հայկ Համբարձումյանը զրուցել է պատմագիտության դոկտոր, պրոֆեսոր,  Հայ-ռուսական համալսարանի Համաշխար¬հային պատմության և արտասահմանյան տարածաշրջանագիտության ամբիոնի վարիչ Երվանդ Մարգարյանի հետ: 

Ղարաբաղյան շարժման 30-ամյակը


Թատերական հրապարակ, բազմահազարանոց հանրահավաքներ, օդ պազված բռունցքներ, զարմանալի միասնական ազգային ոգի  և այս ամենի վրա թևածող շեփորի  հնչյուններ ու «Հայեր միացեք» կոչեր: Այս տարի լրանում է  Ղարաբաղյան շարժման 30-ամյակը: Շարժում, որով սկիզբ դրվեց մեր ժողովրդի պատմության նորագույն փուլը: Շարժում, որի ընթացքը, նպատակներն ու արդյունքները կարծես լավ հայտնի են, սակայն շատ հարցեր դեռևս ուսումնասիրության ու պարզաբանման կարիք ունեն: Ղարաբաղյան շարժման բնույթի ու նշանակության մասին Հայկ Համբարձումյանը զրուցել է ազգագրագետ Հարություն Մարությանի հետ: 

Մեդալագործություն


Մեդալագործությունը դրամների ու մեդալների պատրաստման արվեստն է, որն իր ծագմամբ ու զարգացմամբ կապված է մետաղդրամների ստեղծման հետ: Բոլորիս հայտնի են հատկապես Տիգրան Մեծի դիմաքանդակներով դրամները: Իսկ հայկական առաջին մեդալները ստեղծվել են 17-րդ դարում, հիմնականում գաղթօջախներում՝ Հոլանդիայում, Վենետիկում: Այսօր էլ, թեև ոչ մեծ ընդգրկմամբ, սակայն մեդալագործական արվեստը զարգանում է Հայաստանում: Հայ մեդալագործության առանձնահատկությունների, ընդհանրապես արդի քանդակագործության խնդիրների  մասին Հայկ Համբարձումյանը զրուցել է քանդակագործ Գուրգեն Հակոբյանի հետ:

Հրանտ Մաթևոսյանի անտիպները


Լույս է տեսել Հրանտ Մաթևոսյանի երկար սպասված «Անտիպներ» երկհատորյակը, որը հնարավորություն կտա ընթերցողին վերստին անդրադառնալու սիրելի հեղինակի ստեղծագործությանը, անտիպ գործերի միջոցով նորովի առնչվելու Հրանտ Մաթևոսյանի նաև հետանկախության շրջանի ստեղծագործությանը և դրանց օգնությամբ վերաիմաստավորելու մեր վերջին տասնամյակների իրականությունը: Երկհատորյակի հրատարակության նաև Հրանտ Մաթևոսյանի գրական ժառանգության պահպանության ու ներկայացման մասին Հայկ Համբարձումյանը զրուցել է «Հրանտ Մաթևոսյան» մշակութային հիմնադրամի տնօրեն, կինոռեժիսոր Դավիթ Մաթևոսյանի հետ:

Արտասահմանյան հայագետների ուսումնասիրությունները՝ հայերեն


ԱՄՆ և Եվրոպայի հայագիտական կնետրոններում կազմակերպվում են հայագիտության տարբեր խնդիրներին նվիրված գիտաժողովներ, օտար լեզուներով հրատարակվում են մենագրություններ և հոդվածներ, սակայն դրանց մեծ մասը հասանելի չէ հայալեզու ու հայաստանյան գիտական հանրությանը: Հազվադեպ են օտարալեզու այդ ուսումնասիրությունների թարգմանություններն ու հրատարակությունները Հայաստանում: Ինչո՞ւ է այդպես, ինչպե՞ս է հնարավոր զարգացնել հայաստանյան ու արտասահմանյան հայագիտության կապերը, մեծացնել փոխադարձ ճանաչելիության աստիճանը: Այս հարցերի մասին Հայկ Համբարձումյանը զրուցել է Միչիգանի համալսարանի պրոֆեսոր, հայագետ Գևորգ Բարդաքչյանի հետ:

Հանդուրժողականությունն ու անհանդուրժողականությունը հայ գրականության մեջ


Հանդուրժողականությունը այլ ազգության կամ կրոնական պատկանելության, աշխարհայցքի, կենսակերպի, վարքի ու ավանդույթների նկատմամբ հարգանքի կամ համբերանքի արտահայտություն է: Թե որքանով ենք մենք՝ հայերս հանդուրժող, տարբեր կարծիքներ կան: Հանդուրժողականության թեման հետաքրքիր դրսևորումներ է գտել հայ գրականության մեջ: Հանդուրժողականության ու անհանդուրժողականության տարբեր դրսևորումների մասին Հայկ Համբարձումյանը զրուցել է «Եվրասիա համագործակցություն» հիմնադրամի տնօրեն, հրապարակախոս Գևորգ Տեր-Գաբրիելյանի հետ: