Շարքի  հերոսները դպրոցահասակ երեխաներ են՝ իրենց հետաքրքրություններով և հոգսերով: Բայց կա մի բան, որ նրանք անում են մեծ ջանասիրությամբ` շապիկ են հագնում և Խորան բարձրանում. ծառայում եկեղեցում որպես դպիր:   
Յուրաքանչյուր  հաղորդում մի պատմություն է, եկեղեցու հետ հաղորդակցության մի դեպք:
 
Պարբերականությունը՝ երկուշաբթի, ժամը 21:00-ին

Ծաղկազարդ


Հայաստանի տարբեր եկեղեցիներում ծառայող 16 մանուկ դպիրներ Ծաղկազարդի տոնն անցկացրեցին Մայր Աթոռ Ս. Էջմիածնում, առաջին անգամ պատարագի մասնակցեցին Մայր տաճարի խորանին, ապա՝ հանդիպեցին Վեհափառ հայրապետի հետ ու նվերներ փոխանակեցին: Թե ինչպես էին պատրաստվել այդ օրվան և ինչ ապրումներ ունեցան, պատմում են իրենք՝ մանուկ դպիրները: 

Երեք եղբայր


«Նարեկը երազում է զինվորական դառնալ, Լևոնը՝ խոհարար, իսկ ես՝ իսկական բժիշկ,-ասում է 8-ամյա Վարդանը,- եղբայրներով սիրում ենք հետաքրքիր խաղեր հորինել, նկարել, բայց ամենից շատ սպասում ենք կիրակիին, որ Սբ. Երրորդություն եկեղեցում  պատարագի մասնակցենք ու խորան բարձրանանք: Լավ է երբ երեքով միասին ենք երգում ու աղոթում»:

Սբ. Մարիանեի դպիրները


Բագրատն ու Վարդանը երկվորյակներ են: Թե ինչ միջադեպից հետո եղբայրները որոշեցին շապիկ հագնել ու բարձրանալ Աշտարակի Սբ. Մարիանե եկեղեցու խորան, պատմում են Խաչիկ դպիրն ու եղբայրները:

Ջրվեժի դպիրները


«Մեր կիրակին շատ լավ է սկսվում. ես, Ռաֆայելն ու հայրիկը շապիկ ենք հագնում ու խորան բարձրանում, Անուշն ու Աստղիկը երգչախմբում երգում են, մայրիկն էլ ուշադիր   մեզ է լսում»: Մեր հերոսները Ջրվեժի Սուրբ Կաթողիկե եկեղեցու դպիրներն են:   

Արթուրը և Սարգիսը Մուղնիից


Արթուրի և Սարգսի առօրյան փոխվեց, երբ նրանց առաջարկեցին եկեղեցի հաճախել ու շապիկ հագնել: Նրանք օգնում են քահանաներին ուխտագնացությունների ժամանակ, մասնակցում պատարագներին ու ժամերգություններին: Արթուրը երազում է հայտնի երգիչ դառնալ, Սարգիսը՝ ռազմական բժիշկ:   

Ազատանի եկեղեցու Արթուրը


«Մի անգամ ուխտագնացության ժամանակ դեպք եղավ, ու դրանից հետո մամային խնդրեցի, որ եկեղեցում ծառայեմ»: Տասնամյա Արթուրը Ազատանի Սբ. Ստեփանոս եկեղեցում շապիկ է հագնում և մասնակցում պատարագի: Մեզ հետ կիսում է իր մտորումներն ու պատմում երազանքների մասին. դրանցից ամենակարևորը Ֆրունզիկի պես դերասան դառնալն է:

Ջրվեժի Սբ. Կաթողիկեի Դավիթը


Փոքրիկ Դավիթն մենք հանդիպեցինք Ջրվեժի Սբ. Աստվածածին Կաթողիկե եկեղեցում: Նա մեզ պատմում է առաջին անգամ դպրի շապիկ հագնելու, խորան բարձրանալու և իր երազանքների մասին:

Արթուրը


Արթուրն ինքը որոշեց մոտենալ տեր հորն ու խնդրել, որ շապիկ հագնի: Մայրիկը անակնկալից հուզվել էր: Սբ. Գրիգոր Լուսավորիչ եկեղեցում ամեն կիրակի Արթուրը մասնակցում է պատարագի, ուրախությամբ նշում է, որ արդեն երիտասարդաց միության անդամ է: Սպորտում Արթուրը հաջողություններ ունի, բայց որոշել է հոգևորական դառնալ: 

Վռամը


Մի անգամ ուխտագնացության ժամանակ Վռամը ցանկություն է հայտնում շապիկ հագնել ու մասնակցել պատարագներին: Այսօր արդեն դպիր է ձեռնադրվել, Երևանի Սբ. Երրորդություն եկեղեցում է ծառայում, որոշել է դառնալ հոգևորական: Սկսել է շարականներ սովորեցնել փոքր եղբորը. մեծ եղբոր օրինակը վարակիչ է: 

Պանայոտիս Դմիտրիս


«Հեռուստացույցով տեսա, թե ինչպես են երեխաները քաղաքներում և գյուղերում դպրություն անում: Առիթ չկար, որ ասեի՝ ես էլ եմ ուզում: Մի անգամ տատիկս քահանա կանչեց տնօրհնեք անելու, օգտագործեցի առիթը և ասացի՝ ես էլ ուզում եկեղեցում դպրություն անել»: Իննամյա Դմիտրին այսօր մեծ ուրախությամբ դպրություն է անում Երևանի Ս. Աննա եկեղեցում: 

Հեղինեն


Մի ուխտագնացությունից հետո Հեղինեն որոշեց գնալ Նորագավիթի Սուրբ Գևորգ եկեղեցու կիրակնօրյա դասերին, հետո սկսեց մասնակցել պատարագներին, իսկ հետո... 

Արամը


Ամեն ինչ սկսվեց այն պահից, երբ  Արամի կնքահայրը  նրան նվիրեց  «Մանուկների Աստվածաշունչը»: Հիմա նա Սուրբ Երրորդություն եկեղեցում  շապիկ է հագնում, բարձրանում է խորան ու մասնակցում պատարագներին: Արամը որոշել է, թե ինչ է դառնալու և հավատում է, որ երազանքը կիրականանա: