Հաղորդաշարը պատմում է հատուկ կրթական այն հաստատությունների մասին, որտեղ հավաքված է մեր ազգի ներուժը: Հայ եկեղեցու Հայորդյաց տներ, գեղարվեստի ու երաժշտության դպրոցներ, արվեստի ու գիտության թեքումով կրթօջախներ, ամառային ճամբարներ ու հատուկ ծրագրեր, որոնք նպատակ ունեն բացահայտել մանուկների և պատանիների շնորհները: 

Նոր Նորքի հայորդյաց տան «Շողակաթ» երգչախումբ


Շողակաթ» երգչախմբի սաներն արդեն պրոֆեսիոնալ բեմ են դուրս գալիս, համագործակցում Վահան Արծրունու, Էդ. Զորիկյանի և հայտնի այլ երգիչների հետ: Եվ ամենակարևորը՝ նրանք ապրում են մեծ ու ջերմ ընտանիքի անդամների պես:

Alt

Էջմիածնի հայորդյաց տան կամերային դասարան


Ջութակահար Ժենին Սիրիայից երեք տարի առաջ է տեղափոխվել Հայաստան: Այստեղ աղջիկը հանդիպել է իր ուսուցչուհի Փառանձեմ Մելիքյանին և ընկերուհուն՝ Մերիին: Էջմիածնի հայորդյաց տունը նրանց բոլորի հարազատ, բաց ու ջերմ տունն է...

Alt

Նոր Նորքի հայորդյաց տան նկարչության դասարան


Նկարելով մեր աշխարհն ու բնությունը` ես հասկացել եմ, որ թանկարժեք իրերն այդքան էլ կարևոր չեն մարդու համար: Կարևորը բնությունն է, առանց բնության մարդն էլ չի լինի»,-  ասում է  Նոր Նորքի հայորդյաց տան նկարչության դասարանի սան, 12-ամյա Ինեսսան:

Նոր Նորքի հայորդյաց տան «Նարեկ» պարային համույթ


«Պարը մեր կյանքն է: Երբ վարագույրը փակվում է, արդեն սկսում ենք մտածել, թե երբ է լինելու հաջորդ ներկայացումը»: 
Մեր հերոսները Նոր Նորքի հայորդյաց տան «Նարեկ» պարային համույթի սաներն են:  
 
Alt

Արաբկիրի հայորդյաց տան գորգագործության դասարան


Հանգույցները կապում ես իրար, հետո` թելերը կտրում ու պատմում քո հեքիաթը… Արաբկիրի հայորդյաց տան գորգագործության դասրանում երեխաները ոչ միայն սովորում են գորգ գործել, այլև խաղիկների ու ազգային երգերի միջոցով բացահայտում են  հայկական գորգագործության գաղտնիքները:

Alt

Արաբկիրի հայորդյաց տան կարատեի դասարան


Եթե ուզում ես ստանալ սև գոտի, եթե ուզում ես հաղթահարել քո վախերն ու բարդույթները, եթե ուզում ես  ունենալ լավ ընկերներ, ուրեմն պիտի գաս Արաբկիրի հայորդյաց տուն»,-ասում են կարատեի դասարան հաճախող տղաներն ու աղջիկները:

Մալաթիայի հայորդյաց տան ավիամոդելավորման դասարան


Եթե ուզում ես զգալ թռիչքի ազատությունը, ուրեմն քո ձեռքով պիտի ինքնաթիռ սարքես ու թռցնես: Եթե ուզում ես ինքնաթիռ հավաքել, ուրեմն պիտի մանրամասն ու համբերատար հաշվարկես ամեն դետալ ու կպցնես իրար: Մալաթյայի հայորդյաց տանը` ավիամոդելավորման դասարանում պատանիները բացահայտում են թռիչքի գաղտնիքներն ու ուրախությունը:

Alt

Մալաթիայի հայորդյաց տան թատերական դասարան


Մալաթիայի հայորդյաց տան թատերական ստուդիայի յուրաքանչյուր նորեկ ստանում է իր դերը, բեմ է բարձրանում ու ... սիրահարվում թատրոնին: Ստուդիան 20 տարվա պատմություն ունի: Այստեղ կարևորը ազատ ու անկաշկանդ լինելն է ու դերի միջոցով հանդիսատեսին սեփական պատմությունը ներկայացնելը:

Alt

Օվսաննան


Օվսաննան երազում է ներկել Երևանը: Երազում է ստեղծել իր օպերան, թռչել իր օդապարիկով: Ուզում է նաև ձկան նման լողալ և տեսնել ջրի հատակը: 
Վեց տարեկանում, երբ Օվսաննան առաջին անգամ եկավ Արաբկիրի հայորդյաց տուն, ընտրեց նկարչության, պարի դասարանները, հետո ընդունվեց Կանթեղ» երգչախումբ ու դեռ մտածում է նոր դասարանների մասին... 

 

Էջմիածնի հայորդյաց տան ձյուդոյի դասարան


Հինգ տարի առաջ Սևակը իր ընկեր Հակոբին համոզեց գալ ձյուդոյի դասարան՝ ասելով, որ այստեղ ֆուտբոլ են պարապում: Իսկ Ռուբենը համոզված է, որ ձյուդոյում և ֆուտբոլում ընդհանուր մի բան կա՝ պետք է լինել արագաշարժ և ճկուն: Այդպես անցնելով պարտությունների փորձությունը՝ կարող ես ուժեղանալ և հասնել կարևորագույն նպատակին՝ դառնալ չեմպիոն: 

Alt

Էջմիածնի հայորդյաց տան քանոնի դասարան


Այստեղ նոտաները սովորում են գույնզգույն լարերով, իսկ առաջին լուրջ մեղեդին Ծափիկ- ծիրանիկն է»: Հետո արդեն կազմում են տրիոներ ու համույթներ և դառնում պրոֆեսիոնալ քանոնահարներ: Քանոնի դասարանի ուսուցիչ Մարինե Միրզոյանի կարծիքով Թագուհին, Սրանուշն ու Անահիտն արդեն պրոֆեսիոնալ երաժիշտներ են, մասնակցում են հյուրախաղերի ու մրցույթների: Երեք ընկերուհի, երեք քանոն՝ տրիո կյանքում և բեմում:

Alt

Նորքի հայորդյաց տան հարվածային գործիքների դասարան


Մեկ, երկու, երեք, չորս...  դհոլ, թմբուկ, ծնծղա, զարբ:  Եթե հաշվելով սովորես, ապա շատ կարճ ժամանակում կկարողանաս հարվածային բոլոր գործիքները շատ լավ նվագել: Պարզապես մինչև չորսը հաշվելու տասնյակ տարբերակներ կան, հետո պետք է միշտ ժամանակին դասի գաս, ֆիզիկական վարժություններ անես, ընկերներիդ ու վարպետներիդ ուշադիր լսես, հա, մեկ էլ սկզբում կոշտուկներ կարող են լինել ձեռքերիդ մեջ ու ականջներդ կարող են ցավալ անսովորությունից: Ու վերջ, էլ ոչ մի դժվարություն: Իսկ առավելություններն ու հաճույքները թվարկել հնարավոր չէ: Լսել ու տեսնել է պետք: