«Եկեղեցական կյանք» լրատվական թողարկումը ներկայացնում է Հայ Առաքելական եկեղեցու գործունեությունը կրթական, մշակութային, հասարակական, առողջապահական և այլ ոլորտներում, անդրադառնում եկեղեցական տոներին, պատմում թեմերին կից գործող հասարակական կառույցների, երիտասարդական շարժումների, հայորդյաց տների գործունեության մասին: Ներկայացնում է Մայր Աթոռ Սուրբ Էջմիածնի հոգևոր ծառայությունը, Հայ եկեղեցու և հայ հավատացյալի համայնքային կյանքը հայրենիքում և արտասահմանյան թեմերում:
Պարբերականությունը՝ ամեն երկուշաբթի և ուրբաթ, ժամը 19:30-ին և 21:30-ին
Կրկնությունը՝ երեքշաբթի և շաբաթ, ժամը 08:00-ին և 10:30-ին
Հեռարձակվում է նաև Հայաստանի հանրային հեռուստատեսության արբանյակային ալիքով: 

Եկեղեցական կյանք 16.11.2018


Նոյեմբերի 15-ին ՄԱԿ-ի Բնակչության հիմնադրամի աջակցությամբ և ԵՀԽ հայաստանյան Կլոր սեղան հիմնադրամի հյուրընկալությամբ տեղի ունեցավ Հայ առաքելական եկեղեցու և ՀՀ ոստիկանության համագործակցության վերաբերյալ համաժողով, որը նախագահում էր Նաթան արքեպիսկոպոս Հովհաննիսյանը:                      Բանախոսներն էին Բագրատ եպիսկոպոս Գալստանյաը և ՀՀ ոստիկանության անչափահասների գործերով և ընտանիքում բռնության կանխարգելման վարչության պետ Նելլի Դուրյանը: 
Նոյեմբերի 10-ից 11-ը Մոսկվայի եկեղեցական համալիրի հանդիսությունների սրահում տեղի ունեցավ «Հայ մշակույթի ոսկեդարը․ համաշխարհային նշանակության նվաճումներ» միջազգային գիտաժողովը, որին մասնակցում էին 35 հայագետներ, մշակութաբաններ, պատմաբաններ Հայաստանից, Ռուսաստանից և Հոլանդիայից։
Մայր Աթոռի հրատարակչությունը լույս է ընծայել ընծայել Ռուբեն վարդապետ Զարգարյանի «Հիսուս Մարկոսի ավետարանում» գիրքը: 
Նոյեմբերի 15-ին Գևորգյան հոգևոր ճեմարանի հանդիսությունների դահլիճում տեղի ունեցավ Սամվել Մհերյանի «Եվ եղաւ լոյս» պատմավեպի շնորհանդեսը: 
Հայաստանում Ֆրանկոֆոնիայի 17-րդ գագաթնաժողովի շրջանակում Երևանի մատենադարանը ՀԲԸՄ հովանավորությամբ հրատարակել է հայկական մանրանկարչությանը նվիրված պատկերագիրք: 
Կալկաթայում ընթացող «Tata Steel» արագ շախմատի մրցաշարին մասնակցող աշխարհի գործող գավաթակիր Լևոն Արոնյանը Հայոց մարդասիրական ճեմարանի կառավարիչ Մովսես աբեղա Սարգսյանի հրավերով այցելել է ճեմարան, հանդիպել աշակերտների հետ։
 

Եկեղեցական կյանք 12.11.2018


Որոտան-Խնձորեսկ ճանապարհին զինվորական մարդատար ավտոմեքենայի ողբերգական վթարի հետևանքով զոհված զինվորականների համար Ս. Էջմիածնում հոգեհանգստյան կարգ կատարվեց: 
Մաշտոցյան մատենդարանի ձեռագրական հավաքածուն համալրվել է 17-րդ դարի ձեռագրով: 
Սպիտակի Կաթնաջուր համայնքի Սուրբ Հովհաննես եկեղեցու վերականգնումը շարունակելու համար գյուղի բնակիչները դիմում են միջոցներ ունեցող իրենց հայրենակիցներին: 
Երևանի Արամի 29 հասցեում խաչքարագործների արդեն երկրորդ սերունդն է աշխատում: 
Մարմարաշենի Սուրբ Գևորգ եկեղեցու բակում շուրջ 50 նշենի է տնկվել:
 

Եկեղեցական կյանք 09.11.2018


Բողոքի ակցիա՝ ընդդեմ ԼԳԲՏ քրիստոնյա ֆորումի անցկացմանը Հայաստանում:
«Նարեկացիական ընթերցումներ» չորրորդ միջազգային գիտաժողովը և «Նարեկի» հոլանդերեն թարգմանության շնորհանդեսը՝ Մաշտոցյան մատենադարանում:  
Հոռոմայրի Սուրբ Նշան վերաօծված եկեղեցու ուխտի օրը: 
Տաք գուլպա զինվորին՝ Բյուրավանի Սուրբ Գրիգոր Լուսավորիչ եկեղեցու տիկնանց միության կողմից: 
Մաթոսավանքի 3D մոդելը՝ «Թումո» ստեղծարար տեխնոլոգիների կենտրոնի սովորողների և ամերիկացի դասընթացավար Ջեյ Պերեզի կողմից:
 

Եկեղեցական կյանք 05.11.2018


Նոյեմբերի 4-ին նշվեց հայ եկեղեցու գահակալի` Գարեգին Բ Ամենայն հայոց կաթողիկոսի օծման և գահակալության 19-րդ տարեդարձը: Հայոց բոլոր եկեղեցիներում կատարվեց հայրապետական մաղթանք:
Նոյեմբերի 5-ին Հայոց հայրապետին շնորհավորավելու էին եկել Մայր Աթոռ Սուրբ Էջմիածնի հոգևոր կրթական հաստատությունների աշխատակիցները: 
Ուրուգվայից ժամանած մի խումբ ուխտավորներ Հայաստանում և Արցախում շրջելուց հետո, հրաժեշտից առաջ այցելել էին Մայր Աթոռ`Ամենայն հայոց կաթողիկոսի օրհնությունն ստանալու: 
Աշխարհահռչակ երգեհոնահարուհի Նարինե Սիմոնյանի նվիրատվությամբ Գյումրու Սուրբ Նշան եկեղեցում երգեհոն է տեղադրվել: Նոյեմբերի 4-ին այն հանդիսատեսի առջև գործարկվեց: Համերգի պատվավոր հյուրն էր Հասմիկ Պապյանը: 
Կալակաթայի հայոց մարդասիրական ճեմարանի սեփականություն հանդիսացող հերթական կալվածքն է հետ վերցվել հնդկական մի ընկերությունից:  
«Վերածնունդ» մշակութային հիմնադրամը նախաձեռնել է Նարեկացու «Մատյան ողբերգության» ստեղծագործության քանդակի մրցույթը: 
 

Եկեղեցական կյանք 02.11.2018


Հոկտեմբերի 31-ին մեկնարկեց Գերագույն հոգևոր խորհրդի երկրորդ օրվա նստաշրջանը: Մուշեղ եպիսկոպոս Բաբայանը խորհրդի անդամներին ներկայացրեց եկեղեցի-պետություն հարաբերությունների ներկա ընթացքը: Ապա, Գերագույն հոգևոր խորհուրդը անդրադարձավ համասեռամոլության երևույթին: Գարեգին Երկրորդ Ամենայն հայոց կաթողիկոսը խնդրի վերաբերյալ ներկայացրեց իր դիտարկումները և մտահոգությունը: Գերագույն հոգևոր խորհրդի այս քառօրյայում առանձին ներկայացվելու են հաջորդ տարի Կոմիտաս Վարդապետի և Հովհաննես Թումանյանի ծննդյան 150-ամյակի միջոցառումներին վերաբերող ծրագրերը, ինչպես նաև սպասվելիք Ազգային եկեղեցական ժողովի նախապատրաստության հարցերը:
ՀԵՀԵՄ-ը 2018-ի դրամահավաքի շրջանակում մոտ 3 միլիոն դրամ հավաքագրեց, որից 1-ական միլիոն դրամը փոխանցվել է հատուկ կարիքներ ունեցող անձանց խնամք իրականացնող «Սորս» հիմնադրամին, ապրիլյան պատերազմում զոհված 10 զինվորի ընտանիքի, և ևս մեկ միլիոն դրամ՝ «Փիփլ» խնամքի ծառայության շահառուներից 10 անապահով ընտանիքի: Նոյեմբերի 1-ին ՀԵՀԵՄ-ի հոգևոր պատասխանատու և ԱՄՆ արևմտյան թեմի առաջնորդ Հովնան արքեպիսկոպոս Տերտերյանը և Ռումինիայի հայոց թեմի առաջնորդ Տաթև եպիսկոպոս Հակոբյանը հանդիպեցին ծրագրի կազմակերպիչների և շահառու ընտանիքների հետ: 
Հնդկաստանի Կալկաթա քաղաքի հայկական Սուրբ Նազարեթ եկեղեցու բակում շուտով թանգարան կբացվի: Հնդկահայոց հոգևոր հովիվ Մովսես աբեղա Սարգսյանը Հնդկաստանում հոգևոր սպասավորության առաջին օրերից նախաձեռնել, հավաքել և համակարգել է պատմական հայաշատ համայնքի մասին վկայող փաստաթղթեր, արձանագրություններ ու արժեքավոր իրեր:
Նոյեմբերի 1-ին հայաստանյան 10 ԲՈՒՀ-երի ուսանողական խորհրդի ներկայացուցիչներ և ակտիվիստ-ուսանողներ հանդիպեցին Հայ եկեղեցու համաշխարհային երիտասարդական միավորման պատասխանատու բարձրաստիճան հոգևորոկանների հետ՝ համատեղ քննարկելու ուսանողության խնդիրներն ու հետագա անելիքները:
Միջազգային լուրեր-Ալժիրում իշխանություններն արգելել են կանանց նիկաբ կրել աշխատավայրերում: Իռլանդիայում քվեարկել են աստվածանարգության սահմանադրական արգելքը հանելու օգտին: Իսլանդիայում մեծ ժողովրդականություն է ձեռք բերել վիկինգների՝ Ասատրու կոչվող հին հեթանոսական կրոնը: Վատիկանը և Չինաստանը համաձայնագիր են ընդունել Չինաստանում կաթոլիկների վիճակի վերաբերյալ: Այսուհետ Հռոմի պապը կկարողանա հաստատել Պեկինի առաջադրած եպիսկոպոսների թեկնածությունը:
 

Եկեղեցական կյանք 29.10.2018


Հայ առաքելական եկեղեցին Սուրբ Խաչին նվիրված չորս տոն ունի, որոնցից վերջինը՝  Խաչի գյուտի տոնը, նշվեց հոկտեմբերի 28-ին: Երևանի Զորավոր  Սուրբ Աստվածածին եկեղեցու հավատացյալների  համար տոնը նշանավորվեց մեկ այլ հանգամանքով ևս: Այս տարի մասնագետները պարզել են, որ եկեղեցում անհիշելի ժամանակներից պահվող մի խաչ մասունքակիր է: Այսուհետ ամեն տարի, Գյուտ խաչի տոնին, մասունքը դուրս կբերվի՝ ի երկրպագություն հավատացյալների: 
Խաչի գյուտի տոնին Գուգարաց թեմի առաջնորդ Սեպուհ արքեպիսկոպոս Չուլջյանի ձեռամբ, վերաօծվեց Ստեփանավանի տարածաշրջանի Ուռուտ համայնքի Սուրբ Սարգիս եկեղեցին և մատուցվեց առաջին պատարագը: 5-րդ դարում կառուցված եկեղեցին 130 տարի չէր գործել: 
Հոկտեմբերի 29-ին «Տեսակետ» մամուլի ակումբում համաներման թեմայով քննարկում էր, հյուրերն էին ՔՀ հոգևոր պատասխանատու Ռուբեն վարդապետ Զարգարյանը, սոցիոլոգ Ահարոն Ադիբեկյանը, ԳԽ նախկին պատգամավոր Ազատ Արշակյանն ու գրականագետ Դավիթ Գասպարյանը: Սրբագրում և առողջացում. այս երկու հիմնարար արժեքներն առաձնացրեց Ռուբեն վարդապետ Զարգարյանը համաներման գործընթացի մեջ: 
Երևանի 2800-ամյակին Մայր Աթոռի «Էօրնեկեան» դպրոցի և Կալկաթայի հայոց մարդասիրական ճեմարանի երգչախմբերը Հայաստանին և Երևանին նվիրված երգերով շնորհավորեցին մայրաքաղաքի հոբելյանը: Երգչախմբերի՝ իրար բաժանող տարածությունը կրճատվել էր տեսազանգի օգնությամբ:  
 

Եկեղեցական կյանք 26.10.2018


Հոկտեմբերի 20-ին Գարեգին Երկրորդ Ամենայն հայոց կաթողիկոսը մեկնել էր Իտալիայի Հանրապետություն` հանդիսապետելու Միլանի Սուրբ Քառասուն մանկանց հայկական եկեղեցու կառուցման 60-ամյակին նվիրված արարողությունները: Այցի ընթացքում տեղի ունեցավ Հայաստանյայց առաքելական եկեղեցու և Հռոմի կաթոլիկ եկեղեցու հովվապետերի հանդիպումը: Վերադարձին, Զվարթնոց օդանավակայանում Վեհափառ հայրապետը պատմեց Ֆրանցիսկոս Պապի հետ հանդիպման մանրամասների մասին: Քննարկվել են երկու եկեղեցիներին հուզող հրատապ հարցերը, Մերձավոր Արևելքում տիրող իրավիճակը, Երուսաղեմի կալվածքների հարցերը,  ինչպես նաև  անդրադարձ է կատարվել կաթոլիկ և առաքելական եկեղեցիների համագործակցության հեռանկարներին:   
Հոկտեմբերի 19-ին Ռուսաստանի և Նոր Նախիջևանի հայոց թեմի առաջնորդ Եզրաս արքեպիսկոպոս Ներսիսյանը հովվական այցով մեկնել է Բառնաուլ՝ հանդիսապետելու Սուրբ Հռիփսիմե հայկական եկեղեցու օծման 10-ամյակին նվիրված արարողությունները և մասնակցելու համայնքի ստեղծման 20-ամյակին նվիրված միջոցառումներին։ 
Օծվեց Արմավիր քրեակատարողական հիմնարկի 6-րդ տեղամասի մատուռը:   Մատուռն անվանվեց Սուրբ Գրիգոր Նարեկացի, այդպես էին ցանկացել դատապարտյալները:  ՀՀ ՔԿ հոգևոր առաջնորդ Ռուբեն վարդապետ Զարգարյանը նորաօծ մատուռում առաջին մկրտությունը կատարեց:  
Այս տարի լրանում է Ամենայն հայոց կաթողիկոս Խորեն Մուրադբեկյանի մահվան 80-րդ տարելիցը: Մայր Աթոռ Սուրբ Էջմիածնի «Վաչե և Թամար Մանուկյան» մատենադարանում տեղի ունեցավ կոնֆերանս և ցուցահանդես: Ներկայացված  վավերագրերը պատմում էին խորհրդային իշխանության տարիներին  հայ եկեղեցու վիճակի ու դերի մասին: Ցուցահանդեսին հաջորդեց «Հայոց եկեղեցին 16-20-րդդ դարերում. առաքելություն, մաքառում, նահատակություն, հաղթանակ» կոնֆերանսի բացումը: 
«Ձեռք մեկնիր եղբորդ» բարեգործական ծրագրով Վանաձորում հանձնվեց 23-րդ բնակարանը: Ավետիսյանների վեց հոգանոց ընտանիքի համար բնակարանը գնել են լոսանջելեսաբնակ Սարգիս և Ալիս Սեթյանները:
 

Եկեղեցական կյանք 12.10.2018


Հայոց ցեղասպանության թանգարան-ինստիտուտի ժամանակավոր ցուցադրությունների սրահում բացվել է երկու նոր ցուցադրություն՝ «Ապրելու կամքը և փրկելու առաքելությունը» և «Գրիգոր Ճօլօլեան. Փարիզի հայ լուսանկարիչը»: Թանգարանի տնօրեն Հարություն Մարությանի ուղեկցությամբ՝ ցուցադրվող նմուշներին ծանոթացավ նաև Գարեգին Բ Ամենայն հայոց կաթողիկոսը:  
Հոկտեմբերի 7-ին Ծաղկաձորի Կեչառիս վանական համալիրում ձեռնադրված քահանաները 40-օրյա պահեցողության շրջան են անցնում Մայրավանքում: Հոկտեմբորի 10-ին նորաօծ հոգևորականներին ընդունեց Գարեգին Բ հայրապետը: 
Հայաստանում դիվանագիտական առաքելությունն ավարտող ԱՄՆ արտակարգ և լիազոր դեսպան Ռիչարդ Միլսին ընդունեց Գարեգին Բ Ամենայն հայոց հայրապետը:
Հոկտեմբերի 10-ին, Գարեգին Բ Ամենայն հայոց հայրապետը հանդիպեց զինվորականների չորրորդ խմբին, որոնք Մայր Աթոռի օժանդակությամբ մեկնում են Հնդկաստան՝ բուժման և պրոթեզավորման: 
Հայաստանում Ֆրանկոֆոնիայի օրերի շրջանակում Նորվեգիայի Կրագերո քաղաքի երգչախումբը ելույթ ունեցավ Գյումրու Սբ.Աստվածածին (Յոթվերք) եկեղեցում:
 

Եկեղեցական կյանք 22.10.2018


Հոկտեմբերի 20-ից Գարեգին Բ Ամենայն հայոց կաթողիկոսը Միլանում է՝ հանդիսապետելու Սուրբ Քառասուն մանկանց եկեղեցու կառուցման 60-ամյակի արարողությունները: Հոկտեմբերի 21-ին Քառասուն մանկանց եկեղեցում հայրապետական պատարագ մատուցվեց: 
Գարեգին Երկրորդ Ամենայն հայոց կաթողիկոսը շնորհավորական ուղերձ է հղել Մեծի Տանն Կիլիկիո կաթողիկոս Արամ Աաջինին՝ քահանայական ձեռնադրության և օծման 50-ամյակի առիթով:
Հոկտեմբերի 20-ին Մայր Աթոռ Սուրբ Էջմիածնի միաբաններ մեկնեցին Լիբանան՝ մասնակցելու Արամ Ա Մեծի Տանն Կիլիկիո կաթողիկոսի քահանայական ձեռնադրության և օծման 50-ամյակին նվիրված արարողություններին:
«Արվեստը՝ սահմանին». Տավուշի մարզի Բերքաբեր գյուղում սրճարան է բացվելու, այն ձևավորում են Երևանից մեկնած նկարիչները: 
Հոկտեմբերի 20-ին Արագածոտնի մարզի Ագարակ գյուղում հոգևոր-կրթական կենտրոն բացվեց: 
 

Եկեղեցական կյանք 19.10.2018


Հայաստանի գիտությունների ազգային ակադեմիան 75 տարեկան է: Սպենդիարյանի անվան օպերայի և բալետի ազգային ակադեմիական թատրոնում, հոկտեմբերի 18-ի հանդիսավոր նիստին մասնակցում էին նաև Ամենայն հայոց կաթողիկոս Գարեգին Երկրորդը, նախագահ Արմեն Սարգսյանը: Նորին սրբության խոսքով՝ Ակադեմիայի 75-ամյա հոբելյանը պատեհ առիթ է խորհրդածելու, թե արդի աշխարհի պահանջներին համահունչ ինչ պետք է անել մեր երկրում գիտությանը զարկ տալու, պետության և ազգի բաղձալի առաջընթացն ապահովելու համար: Իսկ նախագահ  Սարգսյանի կարծիքով՝ Գիտությունների ազգային ակադեմիան պետք է 21-րդ դարում դառնա մեր առաջընթացի ինքնատիպ գրավականը:
Հոկտեմբերի 16-ին կատարվեց Տաթևի վանական համալիրի Սուրբ Աստվածածին եկեղեցու վերաօծման արարողությունը: Տոնական օրը բազմամարդ էր եկեղեցին: Տաթևի վանական համալիրի վերականգնման աշխատանքներն իրականացվել են IDeA հիմնադրամի «Տաթևի վերածնունդ» ծրագրի շրջանակներում՝ Մայր Աթոռ Սուրբ Էջմիածնի և ՀՀ մշակույթի նախարարության հետ համագործակցությամբ:
Հայաստանի, Արցախի և սփյուռքի հայոց թեմերում ծառայող շուրջ 20 քահանաներ այս օրերին Սուրբ էջմիածնում աղոթքի և խոկման երեքշաբաթյա շրջան են անցկացում, ապրում են «Գարգեին Ա» կրթական կենտրում, լսում դասախոսություններ՝ թարմացնելով իրենց ծիսական, աստվածաբանական, պատմական գիտելիքները: Քահանաների՝ արդեն 7-րդ խումբն է մասնակցում այդ դասընթացներին: Նրանց հետ պարտադիր հանդիպում է նաև Ամենայն հայոց հայրապետը:
Հոկտեմբերի 16-ին Հայ եկեղեցին նշեց Սուրբ Անանիայի հիշատակության օրը: Մայր Աթոռ Սուրբ Էջմիածնից Երևանի Զորավոր Ս. Աստվածածին եկեղեցի բերվեց Անանիայի մասունքակիր Աջը: 
Հոկտեմբերի 16-ին տեղի ունեցավ Թովմա քահանա Անդրեասյանի «Մի կնոջ դիմանկարը» ձայնասկավառակի շնորհանդեսը, որում ներառված են հեղինակի լարային կվինտետի համար գրված սյուիտը և 12 կիթառային պիեսներ: 
Միջազգային լրահոս- ԱՄՆ Վիրջինիա նահանգի դպրոցներից մեկում տնօրինությունը կարգադրել է այս տարի չօգտագործել Քրիստոսի անունը սուրբծննդյան սաղմոսներ երգելիս:
Մոսուլ քաղաքի մուսուլման ընտանիքներից մեկը ջիհադիստներից փրկել և թաքցրել է հին քրիստոնեական ձեռագրեր: 
Ղազախստանում ավարտվել է համաշխարհային և ավանդական կրոնների վեցերորդ կոնգրեսը: 
Չինաստանի նահանգներից մեկում ուսուցիչները հարցաթերթիկներ լրացնելիս շուրջ երեք հարյուր քրիստոնյա աշակերտների ստիպել են ներկայանալ որևէ դավանանքի չհետևող`անհավատ, համառողներին՝ սպառնացել տարբեր պատիժներով: 
 

Եկեղեցական կյանք 15.10.2018


Հոկտեմբերի 13-ին Օշականում նշվեց սուրբ թարգմանիչների տոնը: Սուրբ Մեսրոպ Մաշտոցի անունը կրող եկեղեցում մատուցվեց պատարագ: Օշականի եկեղեցու դպրատանը կայացավ «Կանթեղ» մրցանակաբաշխությունը: Այն Գրողների միությունը կազմակերպում է Մայր Աթոռ Ս. Էջմիածնի հետ: Թարգմանչաց տոնի առիթով թարգմանիչները պարգևատրվում են արդեն 16-րդ անգամ: 
ՌԴ Վլադիվոստոկ քաղաքում օծվեց Սուրբ Գևորգ նորակառույց եկեղեցին: 
Հոկտեմբեր 12-ին տեղի ունեցավ Բուլղարիայի Բուրգաս քաղաքի Սուրբ Խաչ հայկական եկեղեցուն կից թանգարանի բացման արարողությունը: Թանգարանը կկոչվի երջանկահիշատակ Վազգեն Ա Ամենայն հայոց հայրապետի անունով:  
ՀՀ մշակույթի նախարարության նախաձեռնությամբ՝ Սյունիքի մարզի 10-11-րդ դարերին թվագրվող Որոտնավանքի վանական համալիրում վերականգնման և պահպանության աշխատանքներ են ընթանում: 
Օձունի Ս. Աստվածածին վանական համալիրի բակում ամփոփվեց «Համագործակցության և բարեկամության ներկապնակ» խորագրով միջազգային փառատոնը: Տարբեր երկրներից ժամանած 20 նկարիչներ տասը օր շարունակ կտավին հանձնեցին Լոռվա տարածաշրջանի պատմաճարտարապետական հուշարձանների և բնության պատկերներ:
 

Եկեղեցական կյանք 08.10.2018


Հոկտեմբերի 7-ին յոթը սարկավագներ Կեչառիսի վանական համալիրում քահանայության կոչվեցին: Առաքել արքեպիսկոպոս Քարամյանը սրբալույս մյուռոնով օծեց ձեռնադրվողների ճակատն ու ձեռքերը և նոր անուններ տվեց նրանց՝ Սիոն, Գևորգ, Նարեկ, Նահապետ, Երեմիա, Աստվածատուր, Տաճատ: 
Ամեն տարի հոկտեմբերի 4-ին մոտ կիրակին նշվում է որպես Մասիսի Ս. Թադեոս եկեղեցու ուխտի օր: 
Արագածոտնի մարզի Ագարակ գյուղը նշեց գյուղի վերածննդի տասնամյակը: 
Հոկտեմբերի 7-ին Հառիճի վանական համալիրում «Հովեր» պետական կամերային երգչախմբի արական կազմի կատարմամբ հնչեց Կոմիտասի Պատարագը: 
Հոկտեմբերի 7-ը՝ գրադարանավարի օրը, ամեն տարի նշվում է նաև Մայր Աթոռի «Վաչե և Թամար Մանուկյան» մատենադարանում։ 
Հոկտեմբերի 6-ին ՀՀ մի խումբ քաղաքացիներ բողոքի ակցիա էին կազմակերպել՝ ընդդեմ ԼԳԲՏ քրիստոնյա ֆորումի անցկացմանը Հայաստանում: