«Եկեղեցական կյանք» լրատվական թողարկումը ներկայացնում է Հայ Առաքելական եկեղեցու գործունեությունը կրթական, մշակութային, հասարակական, առողջապահական և այլ ոլորտներում, անդրադառնում եկեղեցական տոներին, պատմում թեմերին կից գործող հասարակական կառույցների, երիտասարդական շարժումների, հայորդյաց տների գործունեության մասին: Ներկայացնում է Մայր Աթոռ Սուրբ Էջմիածնի հոգևոր ծառայությունը, Հայ եկեղեցու և հայ հավատացյալի համայնքային կյանքը հայրենիքում և արտասահմանյան թեմերում:
Պարբերականությունը՝ ամեն երկուշաբթի և ուրբաթ, ժամը 19:30-ին և 21:30-ին
Կրկնությունը՝ երեքշաբթի և շաբաթ, ժամը 08:00-ին և 10:30-ին
Հեռարձակվում է նաև Հայաստանի հանրային հեռուստատեսության արբանյակային ալիքով: 

Շարլ Ազնավուրի մահվան կապակցությամբ ցավակցագիր է հղել Ամենայն հայոց կաթողիկոսը


«Ցավ էր Մեզ համար լսել մեր ժողովրդի մեծանուն և տաղանդաշատ զավակ Շարլ Ազնավուրի մահվան լուրը:
Վշտալի է կորուստը արժանավոր հայորդու, ով հարազատ ժողովրդի փառքն ու պատիվը հավելեց ու պայծառացրեց իր հռչակով, շնորհներով, բարձր արվեստով և աշխարհի տարբեր երկրների հայտնի բեմերում հնչեցրած իր անզուգական կատարումներով:
Այսօր մխիթարությամբ ենք անդրադառնում, որ բարեհիշատակ Շարլ Ազնավուրը հոգով ու սրտով միշտ եղել է Հայաստանի հետ, հպարտացել իր ազգային ինքնությամբ: Մեր ժողովրդին պատուհասած աղետալի երկրաշարժի օրերին Ազնավուրը երգեց ժողովրդի ցավը շատ հայտնի երգիչների հետ, իր բոլորանվեր ջանքերը բերեց Հայաստանի օգնության համար: Նրա հանրահայտ երգերի շարքում են նաև Հայաստանին, Ցեղասպանության սուրբ նահատակերին նվիրված ստեղծագործությունները, որոնք վերստին բացահայտում են մեծանուն հայորդու հայրենասեր ու ազգանվեր ոգին: 
Շարլ Ազնավուրի մահը կորուստ է ողջ աշխարհի համար, քանզի նա իր համաշխարհային ճանաչումով ու արժեքով նաև ողջ մարդկության զավակն է, որին գիտեն, սիրում են և ում համար այսօր աղոթում են ամենուր: Մեր աղոթքն ենք բարձրացնում առ Աստված մեծանուն հայորդու հոգու հանգստության համար:
Հոգելույս Շարլ Ազնավուրը մեզ թողեց իր վառ կերպարը, հիասքանչ երգերը, սերն ու բարությունը և երկրավոր ճանապարհը ավարտելով՝ շարունակում է իր ընթացքը դեպի հավերժություն և հավիտենական կյանք», - ասված է Վեհափառ հայրապետի ցավակցագրում:
 

Եկեղեցական կյանք 01.10.2018


Հայ առաքելական եկեղեցին Խաչվերացի երրորդ կիրակի օրը նշում է Վարագա Սուրբ Խաչի տոնը: Այս տարի այն նշվեց սեպտեմբերի 30-ին, որի առիթով Տավուշի մարզի Նոր Վարագավանք եկեղեցում թեմի առաջնորդ Բագրատ եպիսկոպոս Գալստանյանի առաջնորդությամբ մատուցվեց Սուրբ պատարագ: Կիրակնօրյա պատարագին նախորդեց եկեղեցու խաչի օծման արարողությունը, որին մասնակցում էին մեծ թվով հավատացյալներ շրջանից և Հայաստանի տարբեր մարզերից, աշխարհի տարբեր ծայրերից տոնի առիթով հայրենիք վերադարձած ուխտավորներ, բարձրաստիճան պետական այրեր: 
Վարագա սուրբ Խաչի տոնին Երևանի Զորավոր Սուրբ Աստվածածին եկեղեցի եկած հավատացյալների երկրպագության համար դուրս բերվեց եկեղեցում պահվող Տիրոջ խաչափայտի մասունքակիր խաչը և տոնական պատարագ մատուցվեց: 
Սեպտեմբերի 30-ին Արագածոտնի թեմի առաջնորդ Մկրտիչ եպիսկոպոս Պռոշյանի ձեռամբ օծվեց Շենավանի նորակառույց եկեղեցին և անվանակոչվեց Ս. Ամենափրկիչ: Եկեղեցին կառուցվել է շենավանցի բարերարներ Արայիկ և Հենրիկ Գրիգորյանների ջանքերով: Ճարտարապետն արդեն լուսահոգի Էդուարդ Գրիգորյանն է: Եկեղեցում սպասավորելու է Ապարանի շրջանի հոգևոր հովիվ Տ. Մուշե քահանա Վահանյանը: 
Սուրբ Գևորգ Զորավարի հիշատակի օրն առանձնահատուկ աշխուժություն էր տիրում Թբիլիսիի Սուրբ Գևորգ առաջնորդանիստ եկեղեցում: Հավատացյալները եկել էին աղոթելու և ստանալու քաջամարտիկ Սուրբ Գևորգի օրհնությունն ու շնորհները: Թբիլիսիի Սուրբ Գևորգ եկեղեցում պահվում է սրբի մասունքը: 
Սուրբ Գևորգ զորավարի տոնը նշվեց Վիրահայոց թեմի այլ եկեղեցիներում նույնպես: 
«Հոդված 3» ակումբում ցուցադրվեց լրագրող Արուս Հակոբյանի «Սահմանի սրբազանը» ֆիլմը: Սահմանի սրբազանը Բագրատ եպիսկոպոս Գալստանյանն է։ Երեք տարի առաջ նա տեղափոխվեց Հայաստան և այսօր առաջնորդում է Ադրբեջանին սահմանամերձ Տավուշի թեմը՝ փորձելով փոփոխություններ բերել ամենօրյա կրակոցների տակ ապրող բնակչության կյանքում։ Ֆիլմում ոչ մի կադր բեմադրված չէ: Հեղինակը պարզապես տեսախցիկը ձեռքին հետևել է Բագրատ սրբազանի ու ժապավենին հանձնել նրա գործունեության տարբեր դրվագները:
Սմբատ Բյուրատի անվան թիվ 125 դպրոցը հյուրերին դիմավորեց համերգային ծրագրով: Հոկտեմբերի 1-ին այստեղ ամփոփվեց «Աստվածաշնչային գիտելիք» վիկտորինան: Խաղը կազմակերպել էր Հայաստանի Աստվածաշնչային ընկերությունը: Վիկտորինան «Առաքելություն մանուկներին» ծրագրի բաղադրիչներից է: Արդյունքներն ամփոփելիս Հայաստանի Աստվածաշնչային ընկերության գլխավոր քարտուղար Եզնիկ արքեպիսկոպոս Պետրոսյանը շնորհավորեց հաղթողներին: 14 դպրոցների թիմերը պարգևատրվեցին ամառային էկումենիկ ճամբարի ուղեգրով: 
 

Եկեղեցական կյանք 28.09.2018


Սեպտեմբերի 24-ից Մայր Աթոռի պատվիրակությունը Գարեգին Բ Ամենայն հայոց կաթողիկոսի գլխավորությամբ գտնվում է Նյու Յորքում: Վեհափառ հայրապետը ներկա գտնվեց աշխարհահռչակ Մետրոպոլիտեն թանգարանում «Հայաստան» ցուցահանդեսի պաշտոնական բացման արարողությանը: Հանդիսությանը մասնակցեցին նաև ՀՀ վարչապետ Նիկոլ Փաշինյանը, կառավարության անդամներ: Գարեգին Բ-ը ազգային բարերարների հետ միասին սեպտեմբերի 25-ին ներկա գտնվեց նաև ՄԱԿ-ի գլխավոր ասամբլեայի նիստին ՀՀ վարչապետի ելույթին: Նյու Յորք այցելության ընթացքում Վեհափառ հայրապետը և Նիկոլ Փաշինյանը եղան Սբ. Վարդան եկեղեցում: Ամենայն հայոց կաթողիկոսը աղոթեց և հայրապետական իր պատգամը հղեց ներկաներին:
Սեպտեմբերի 27-ից հոկտեմբերի 1-ը Մայր Աթոռ Սուրբ Էջմիածնում կանցկացվի «Սուրբ գիրքը՝ փոփոխվող աշխարհում» միջազգային համաժողով: Մասնակիցներն արդեն հայոց հոգևոր կենտրոնում են և մինչ համաժողովի աշխատանքները սկսելը, ծանոթացան Մայր Աթոռի թանգարաններում պահող գանձերին: Արևելյան և Արևմտյան ուղղափառ եկեղեցիների և Միացյալ Աստվածաշնչային ընկերության ներկայացուցիչները այցելություն են նախատեսում նաև դեպի Ծիծեռնակաբերդ և մաշտոցյան մատենադարան: Իսկ համաժողովի ավարտին կստորագրեն «Փոխըմբռնման և համագործակցության հուշագիր»: 
Մայր Աթոռի «Վաչե և Թամար Մանուկյան» մատենադարանում այսօր մեկնարկեց «Սուրբ գիրքը փոփոխվող աշխարհում» խորագրով միջազգային համաժողովը: Արևելյան և արևմտյան ուղղափառ եկեղեցիների և Միացյալ Աստվածաշնչային ընկերության ներկայացուցիչները հանդես եկան զեկուցումներով, որոնք վերաբերում էին քրիստոնեական եկեղեցիների և ժողովուրդների կյանքում Սուրբ Գրքի դերին: Ինչպե՞ս ապրել ժամանակակից աշխարհում և միևնույն ժամանակ կրողը լինել Քրիստոսի Ավետարանի. համաժողովի առանցքային հարցերից մեկն էլ սա էր: 
Հայաստանի աստվածաշնչային ընկերությունը թողարկել է Ղուկասի ավետարանը՝ ժեստերի լեզվով: Սկավառակի շնորհանդեսը բացվեց համատեղ աղոթքով, որը կարդաց Նիգերիայից ժամանած կարդինալը: Ներկա էին Արևելյան ուղղափառ եկեղեցիների և Աստվածաշնչային ընկերությունների ներկայացուցիչներ, որոնք այս օրերին Հայաստանում մասնակցում են Ս. Էջմիածնում ընթացող միջազգային համաժողովին: Տեսասկավառակների ստեղծմանը մասնակցել են իրենք՝ լսողական խանգարաումներ ունեցող երիտասարդները: Սա Աստվածաշնչային ընկերության հետ խուլերի համար թողարկված արդեն երրորդ սկավառակն է: 
Կոմիտասի ծննդյան 150-ամյակին ընդառաջ Մայր Աթոռն ու  Էջմիածնի  քաղաքապետարանը համատեղ եռօրյա հոբելյանական միջոցառումների շարք անցկացրեցին: Սեպտեմբերի 27-ին՝ միջոցառումների վերջին օրը, Մայր Աթոռի մատենադարանում բացվեց Կոմիտասին նվիրված ցուցահանդես: Ներկաները հնարավորություն ունեցան ցուցասրահում տեսնել մեծ արվեստագետի արծաթե զարդանախշերով դիրիժորական փայտիկները, մոմակալները, սուրճի գավաթը գդալի հետ և այն թանաքածայր գրիչները, որով Կոմիտասն աշխատել և սերունդներին է փոխանցել իր անգնահատելի մշակումները, ուսումնասիրությունները: Միջոցառման ընթացքում կոմիտասյան երգերով, պատարագի հատվածներով ներկաներին ողջունեց Գևորգյան ճեմարանի երգչախումբը: Միջոցառման երկրորդ մասում հանդես եկավ «Սայաթ-Նովա» աշուղական երգի վաստակավոր անսամբլը՝ Թովմաս Պողոսյանի ղեկավարությամբ: Տոնական օրվա ավարտին ներկաներին շնորհավորեց և իր օրհնության խոսքն ուղեց Մայր Աթոռի միաբան Տ. Զաքարիա ծայրագույն վարդապեդ Բաղումյանը: 
«Մշակույթը որպես սոցիալական փոփոխությունների բանալի» ծրագիրն ամփոփում է արդյունքները: Ծրագրի նպատակն էր` զարգացնել երեխաների ստեղծագործական ներուժը և նպաստել նրանց ներառմանը համայնքների մշակութային կյանքում: «Ընտանիք և համայնք» հասարակական կազմակերպության երկարամյա փորձի արդյունքում ձևավորվել է աշխատանքային մոդել, որի հիմքում մշակույթը դիտարկվում է որպես սոցիալական փոփոխությունների կարևոր գործոն: Ծրագրի շրջանակում աշխատել են «նպաստառուից հարկատու» մեթոդով` երեխաներին և նրանց ընտանիքներին առաջին հերթին օգնելով ձեռք բերել կյանքն ինքնուրույն կառուցելու և ծագած խնդիրները լուծել կարողանալու ունակությունենրը:
 

Եկեղեցական կյանք 24.09.2018


Ապարանի շրջանի Սարալանջ գյուղի համար սեպտեմբերի 21-ը եռակի տոն էր՝ գյուղը միաժամանակ նշում էր Հանրապետության անկախության 27-ամյակը, գյուղի ուխտի և Ս. Մարիամ Աստվածածին եկեղեցու վերաօծման օրը: Արագածոտնի թեմի հոգևոր առաջնորդ Մկրտիչ եպիսկոպոս Պռոշյանը սրբալույս մյուռոնով ու աղոթքով վերաօծեց եկեղեցին, որին հաջորդեց պատարագը:
Կոտայքի թեմի Նոր Գեղի համայնքն այժմ եկեղեցի ունի: Թեմակալ առաջնորդ Առաքել արքեպիսկոպոս Քարամյանի ձեռամբ և թեմի քահանաների մասնակցությամբ օգոստոսի 22-ին օրհնվել և սրբալույս մյուռոնով են օծվել նորաշեն եկեղեցու 16 սյուները, սուրբ Սեղանը, մկրտության ավազանը, Տիրամոր սրբաապատկերը: Օծման ժամանակ նորակառույց կեղեցին կոչվեց սուրբ Հովհաննես Ավետարանչի անունով: 
Սեպտեմբերի 23-ին Օձունի Ս. Աստվածածին վանական համալիրի հարակից բակում անցկացվեց ազգային երգ ու պարի փառատոն՝ «Պետական աջակցություն մշակույթին» ծրագրի շրջանակում: Օձունի վանահայրը սիրով հյուրընկալում է մշակութային խմբերի, աջակցում կազմակերպչական հարցերում: 
Ամռանը Կանադայի հայոց թեմի հովանու ներքո կազմակերպվել է «Արարատ» ճամբարը, որին մասնակցել են շուրջ 130 մանուկներ: Օտտավայից, Տորոնտոյից, Մոնրեալից, Լավալից, Համիլթոնից և Վանկուվերից եկած հայ ընտանիքների երեխաները մեկ շաբաթ միասին են անցկացրել` բացահայտելով իրենց ինքնությունը և ուսումնասիրելով հայ մշակույթը, լեզուն և դավանանքը: 
 

Եկեղեցական կյանք 21.09.2018


ՀՀ անկախության 27-րդ տարեդարձի կապակցությամբ ուղերձ է հղել Գարեգին Բ Ամենայն հայոց կաթողիկոսը:
Սեպտեմբերի 21-ի վաղ առավոտյան Հայաստանի և Արցախի հանրապետությունների հոգևոր և պետական բարձրաստիճան այրերն այցելել են Եռաբլուր պանթեոն: Վեհափառ հայրապետի հանդիսապետությամբ հոգևոր դասն աղոթեց և խնկարկեց Եռաբլուրում հանգչող հայորդիների հիշատակը: 
Ապարանի շրջանի Սարալանջ գյուղի համար սեպտեմբերի 21-ը եռակի տոն էր՝ գյուղը միաժամանակ նշեց Անկախության 27-ամյակը, գյուղի ուխտի օրը և Ս. Մարիամ Աստվածածին եկեղեցու վերաօծման օրը:
 

Եկեղեցական կյանք 16.09.2018 Խաչվերացի տոնական թողարկում


Սեպտեմբերի 16-ի վաղ առավոտյան Գարեգին Բ Ամենայն հայոց կաթողիկոսն ընդունեց «Վորլդ Վիժնի» Արևելյան Եվրոպայի, Միջին Արևելքի երկրների գրասենյակների ղեկավարներին, խորհրդի ղեկավարներին: «Վորլդ Վիժն Հայաստան» գրասենյակի ղեկավար Ժիրայր Էդիլյանն իր երախտագիտությունը հայտնեց Վեհափառ Հայրապետին՝ հանդիպման հնարավորության և իրականացվող ծրագրերին մշտապես սատարելու համար: Հանդիպումից հետո հյուրերը մասնակցեցին Խաչվերացի տոնական պատարագին:
Տաղավար հինգերորդ տոնը՝ Խաչվերացը, Հայ եկեղեցին այս տարի նշեց սեպտեմբերի 16-ին: Խաչվերաց նշանակում է խաչի բարձրացում, պանծացում և խորհրդանշում է Քրիստոսի Խաչափայտի գերությունից ազատագրումը: Տոնի խորհրդին հաղորդակից դառնալու համար շատերը Ս. Էջմիածնի մայր տաճար էին եկել:
Արաբկիրի նորակառույց եկեղեցում այս տարի տոնեցին անդրանիկ Խաչվերացը: 
Մայրաքաղաքում Սուրբ Խաչ անունով առաջին եկեղեցին Ներքին Չարբախ թաղամասում է: Խաչվերացի տոնին պատարագ մատուցեց Տ. Մինաս աբեղա Հախվերդյանը: 
Սեպտեմբերի 16-ին՝ Խաչվերացի տոնին, հակաօդային պաշտպանության զորքերի հոգևոր սպասավոր Տ. Կորյուն քահանա Կարապետյանը զորամասերից մեկում վեմ քարի վրա բաց պատարագ մատուցեց: 
Ս. Էջմիածնի մայր տաճարում Խաչվերացի տոնի երեկոյան ժամերգության ավարտին Ամենայն հայոց հայրապետը կատարեց անդաստանի կարգ: Հայոց հոգևոր առաջնորդը Տիրոջից խաղաղություն խնդրեց բովանդակ աշխարհի չորս կողմերի, հայ ազգի, մեր պետության ու Հայ առաքելական եկեղեցու համար: Աղոթքին միացան նաև հավատացյալները: 
Երեկոյան ժամերգությունից հետո, Արաբկիրի նորակառույց եկեղեցուց Տիրոջ խաչափայտի մասունք պարունակող խաչը՝ ռեհանով ու ծաղիկներով զարդարված, դուրս բերվեց նորակառույց եկեղեցուց, որից հետո անդաստանի կարգ կատարվեց. վարդաջուր ցողվեց հավատացյալների վրա և խաչի նշանով օրհնվեց աշխարհի 4 կողմերը՝ Տիրոջից հայցելով խաղաղություն ու բարօրություն: Արարողության վերջում օրհնված ռեհաններն ու ծաղիկները բաժանվեցին հավատացյալներին՝ հոգու և մարմնի բժշկության համար:
 

Եկեղեցական կյանք 14.09.2018


Սեպտեմբերի 11-ին Ամենայն հայոց Գարեգին Բ կաթողիկոսի նախագահությամբ, Գևորգյան հոգևոր ճեմարանի հանդիսությունների դահլիճում տեղի ունեցավ 2018-19 ուսումնական տարվա բացման արարողությունը: Ճեմարանը նոր ուսումնական տարին սկսում է 102 սովորողով և ասպիրանտուրա ընդունված 7 ուսանողով: Ճեմարանն ունի 22 հոգևորական և 35 աշխարհական դասախոս:
Սեպտեմբերի 12-ին Մայր Աթոռ Սուրբ Էջմիածնում Գարեգին Բ հայրապետն ընդունեց Ֆրանսիայի Հանրապետության սենատի Ֆրանսիա-Հայաստան բարեկամական խմբի պատվիրակության անդամներին: Հայոց հայրապետը ողջունեց պատվիրակության այցը հայոց հոգևոր կենտրոն և կարևորեց ֆրանսիա-Հայաստան և Հայաստան- Ֆրանսիա բարեկամական խմբերի հանդիպումներն ու փոխայցելությունները, որոնք համագործակցության նոր հեռանկարներ են բացում երկրների առջև:  
Սեպտեմբերի 12-ին վաղ առավոտյան, Մայր Աթոռի միաբանների ուղեկցությամբ, Ծիծեռնակաբերդի հուշահամալիր այցելեց քառօրյա այցով Հայաստանում գտնվող Գերմանիայի բողոքական եկեղեցիների խորհրդի պատվիրակությունը՝ նախագահ Հայնրիխ եպիսկոպոս Բեդֆորդ-Շտրոմի ղեկավարությամբ:
Մայր Աթոռ Սուրբ Էջմիածնում հյուրընկալված Գերմանիայի Բողոքական եկեղեցիների խորհրդի պատվիրակության նախագահ Հայնրիխ եպիսկոպոս Բեդֆորդ-Շտրոմը սեպտեմբերի 11-ին Գևորգյան հոգևոր ճեմարանում սաների համար բանախոսություն կարդաց «Հանրային աստվածաբանության նշանակությունը Գերմանիայի ավետարանական եկեղեցում» թեմայով:
Գևորգյան հոգևոր ճեմարանում բացվեց «Արարող ձեռքեր» 10-րդ ցուցահանդեսը, որտեղ իրենց աշխատանքներն էին ներկայացրել երիտասարդ նկարչուհիներ Հայկանուշ Խաչատրյանն ու Սիլվա Մկրտչյանը: 
 

Եկեղեցական կյանք 09.10.2018


Գերմանիայի բողոքական եկեղեցիների խորհրդի պատվիրակությունը, նախագահ Հայնրիխ եպիսկոպոս Բեդֆորդ-Շտրոմի ղեկավարությամբ, Մայր Աթոռ Ս. Էջմիածնում է: Սեպտեմբերի 9-ին Գարեգին Բ հայրապետի հետ բարձրաստիճան հյուրը մասնակցեց կիրակնօրյա պատարագի: Պատարագից հետո Գարեգին Բ հայրապետը եպիսկոպոս Բեդֆորդ-Շտրոմին ընդունեց դիվանատանը: Զրույցի ընթացքում վերահաստատվեց պատրաստակամությունը՝ խթանելու Հայ առաքելական եկեղեցու և Գերմանիայի բողոքական եկեղեցիների խորհրդի միջև առկա կապերը և զարգացնելու հետագա գործակցությունը:
Պատվիրակությունը, Մայր Աթոռի միաբանների ուղեկցությամբ եղավ նաև Գեղարդավանքում:
Մայր Աթոռ Սուրբ Էջմիածնի Գևորգյան հոգևոր ճեմարանի դահլիճում տեղի ունեցած հանդիսությունը նվիրված էր Լիբանանի «Սուրբ Էջմիածնի կրոնասեր տիկնանց համախմբմանը»: Ուղիղ մեկ շաբաթ լիբանանահայ 75 ուխտավոր հյուրընկալվել էր մայր վանքում, ուխտի գնացել հայաստանյան սրբավայրեր, մասնակցել եկեղեցական, ծիսական կյանքին: Լիբանանի կրոնասեր տիկնանց հրաժեշտի հանդիսությունը կայացավ սեպտեմբերի 7-ին:
Ազգային գրադարանը և Մայր Աթոռի մատենադարանը գրքեր են տրամադրում Կալկաթայի հայոց մարդասիրական ճեմարանին:
 

Եկեղեցական կյանք 07.09.2018


Լիբանանահայ շուրջ 70 ուխտավորներ՝ «Սուրբ Էջմիածնի կրոնասեր տիկնանց համախմբման» անդամներ, Ամենայն հայոց կաթողիկոսի հրավերով մեկ շաբաթով հյուրընկալվել են Մայր Աթոռում: 
Սեպտեմբերի 7-ին Գուգարաց թեմի առաջնորդ Սեպուհ արքեպիսկոպոս Չուլջյանի ձեռամբ օծվեց և տեղադրվեց Դսեղի Սուրբ Գրիգոր Լուսավորիչ եկեղեցու վերականգնված զանգակատան խաչը։ Օծվեցին նաև բարերարների կողմից նվիրված սրբապատկերները։ 
Բժիշկ-քայրոպրակտիկներ Քաթինա Մենինգը՝ Միացյալ Նահանգներից, Անա Սալյարեսը՝ Իսպանիայից և Թերեզա Փերթեջյանը՝ Ավստրալիայից արդեն երրորդ անգամ Հայաստան են գալիս՝ օգնելու ողնաշարի առողջական խնդիրներ ունեցող մարդկանց: Այս տարի նրանք հետազոտել ու խորհրդատավական աջակցություն են ցույց տվել Մայր Աթոռի հովանու ներքո գործող հայրոդյաց տների սաներին և աշխատակիցներին:
Սեպտեմբերի 16-ին Հայ առաքելական եկեղեցին կնշի այս տարվա վերջին տաղավար տոնը՝ Խաչվերացը: Բոլոր եկեղեցիներում կմատուցվի տոնական պատարագ: 
 

Եկեղեցական կյանք 03.09.2018


Ամենայն հայոց կաթողիկոսն ու ՀՀ վարչապետի տիկին, «Սիթի օֆ սմայլ» բարեգործական հիմնադրամի հոգաբարձուների խորհրդի նախագահ Աննա Հակոբյանն այցելել են Երևանի Ռ. Յոլյանի անվան արյունաբանական կենտրոն:
Սեպտեմբերի 2-ին Գարեգին Բ Ամենայն հայոց կաթողիկոսը Արցախի Հանրապետության Անկախության տոնի առիթով շնորհավորական ուղերձ է հղել:
Գիտելիքի, գրի և դպրության օրվա առիթով Գարեգին Բ Ամենայն հայոց հայրապետը ուղերձ է հղել: 
Օգոստոսի 31-ին Գուգարաց թեմի առաջնորդ Սեպուհ արքեպիսկոպոս Չուլջյանի ձեռամբ օծվել և տեղադրվել է Հաղբատավանքի Սուրբ Նշան եկեղեցու գմբեթի խաչը:
Սեպտեմբերի մեկից որպես ուխտավորներ Մայր Աթոռ Ս. Էջմիածնում են Բեյրութի «Ս. Էջմիածնի կրոնասեր տիկնանց համախմբումի» 74 անդամներ:
 

Եկեղեցական կյանք 31.08.2018


Օգոստոսի 31-ին հայոց հոգևոր կենտրոն ուխտագնացության էին եկել մանկավարժներ, կրթական գործի կազմակերպիչներ՝ ուսումնական տարին օրհնությամբ և աղոթքով սկսելու համար: Միածնաէջ տաճարում կրթության մշակներին օրհնեց Գարեգին Բ Ամենայն հայոց կաթողիկոսը: 
Օգոստոսի 30-ին Մայր Աթոռ Ս. Էջմիածնում Ամենայն հայոց Գարեգին Բ կաթողիկոսն ընդունեց Կրթության և գիտության նախարար Արայիկ Հարությունյանին: Հանդիպման նպատակներից մեկը պետություն-եկեղեցի համագործակցության հետագա քայլերի քննարկումն էր: 
Հովհաննես Մկրտչի և Հոբ Արդարի հիշատակության օրը Մաշտոցի անվան մատենադարանից Սանգիբարանի ավետարանը տարվեց Էջմիածնի Սուրբ Շողակաթ վանք:
Օգոստոսի 29-ին Մայր Աթոռի «Վաչե և Թամար Մանուկյան» մատենադարանում տեղի ունեցավ Տ. Տիրայր աբեղա Հակոբյանի վարդապետական թեզի պաշտպանությունը։ Ատենախոսությունը նվիրված էր հոգևոր հովվի և համայնքի միջանձնային փոխհարաբերությունների սոցիալ-հոգեբանական առանձնահատկություններին։
Օգոստոսի 30-ին Հայ առաքելական եկեղեցին նշում է Սուրբ Հովհաննես Կարապետի և Հոբ Արդարի հիշատակության օրը: Մայր Աթոռ Սուրբ Էջմիածնից Բյուրականի Սուրբ Հովհաննես բերվեց սրբի մասունքն ամփոփող խաչաձև մասունքարանը և մատուցվեց ուխտի տոնական պատարագ: 
 

Եկեղեցական կյանք 16.07.2018


Երկու օր առաջ մի խումբ մարդիկ Վայոց Ձորի մարզում արգելափակել են Ամենայն hայոց կաթողիկոսի ճանապարհը Գնդեվանք կատարած ուխտագնացության ժամանակ: Հայրապետն ուխտագնացության մեկնել էր միայնակ, առանց ուղեկցողների: Իրավապահներն արգելափակումը դադարեցրել են և Հայրապետը արդեն երեկոյան հասել է Մայր Աթոռ, որտեղ նրան դիմավորել են հոգևոր դասն ու դեպքերին հետևող անհանգստացած հավատացյալները: Մայր Աթոռ է ժամանել և Վեհափառին հանդիպել Մարդու իրավունքների պաշտպան Արման Թաթոյանը: Հայ առաքելական եկեղեցու շուրջ ստեղծված իրավիճակին է անդրադարձել նաև վարչապետ Նիկոլ Փաշինյանը՝ առցանց հնչեցված հարցերին պատասխանելիս: Նա ասել է, որ տեղյակ է Վայոց Ձորի մարզում ստեղծված իրավիճակին և գոհ չէ ոստիկանների գործողությունններից: Այս օրերին ոստիկանությունը որևէ հաղորդում դեռ չի տարածել դեպքերին ձևակերպում տալու, սեփական պասիվությունը բացատրելու կամ հետագա քայլերի մասին :
Հուլիսի 15-ին Ամենայն հայոց կաթողիկոսն ընդունեց Եգիպտոսից և ԱՄՆ արևմտյան թեմից Հայաստան եկած ուխտավորներին: Եգիպտահայ պատանիններն արդեն երրորդ տարին է, հայրենիք են գալիս և երկու շաբաթ անցկացնում «Թումո» ճամբարում: Նրանք հասցրել են շրջել բազմաթիվ սրբավայրերում և որոշել են իրենց ուսումն անպայման Հայստանում շարունակել: Վեհափառ հայրապետը հորդորեց պատանի ուխտավորներին՝ ամեն ինչ անել Եգիպտոսի փոքրաթիվ հայ համայնքն արժանապատիվ ներկայացնելու համար: Ավելի ուշ Գարեգին Բ-ն ընդունեց ԱՄՆ արևմտյան թեմից եկած ուխտավորներին՝ Հարություն քահանա Թաշչյանի առաջնորդությամբ:
Հուլիսի 10-17-ը Կոտայքի թեմի ամառային էկումենիկ ճամբարը հյուրընկալել էր Հայաստանում գործող տարբեր եկեղեցիների՝ 13-16 տարեկան 40 աղջիկների:  Յոթնօրյա ճամբարի ծրագիրն ամփոփվեց աստվածաշնչային գիտելիքի մրցույթ-ստուգատեսով: Երեխաներին  այցելել էին Հայաստանի Աստվածաշնչային  ընկերության գլխավոր քարտուղար Եզնիկ արքեպիսկոպոս Պետրոսյանը և քահանաների վերապատրաստման դասընթացներին մասնակցող հոգևորականնները: Այս տարվա ճամբարը «Սիրիր մերձավորիդ, ինչպես քո անձը» կարգախոսն էր կրում: 
Հուլիս 16-ին Երևանի Սուրբ Աննա եկեղեցում տեղի կունենա արժանապատիվ Տաճատ ավագ քահանա Դավիդյանի հոգեհանգստի արարողությունը։ Տեր հայրը գտնվում էր երեւանյան հիվանդանոցներից մեկի վերակենդանացման բաժանմունքում, ապա տեղափոխվել էր Միացյալ Նահանգներ, որտեղ և վախճանվել է: Հուղարկավորությունը տեղի կունենա ԱՄՆ-ում, մարմինը կամփոփվի լուսահոգի երեցկնոջ կողքին: