«Եկեղեցական կյանք» լրատվական թողարկումը ներկայացնում է Հայ Առաքելական եկեղեցու գործունեությունը կրթական, մշակութային, հասարակական, առողջապահական և այլ ոլորտներում, անդրադառնում եկեղեցական տոներին, պատմում թեմերին կից գործող հասարակական կառույցների, երիտասարդական շարժումների, հայորդյաց տների գործունեության մասին: Ներկայացնում է Մայր Աթոռ Սուրբ Էջմիածնի հոգևոր ծառայությունը, Հայ եկեղեցու և հայ հավատացյալի համայնքային կյանքը հայրենիքում և արտասահմանյան թեմերում:
Պարբերականությունը՝ ամեն երկուշաբթի և ուրբաթ, ժամը 19:30-ին և 21:30-ին
Կրկնությունը՝ երեքշաբթի և շաբաթ, ժամը 08:00-ին և 10:30-ին
Հեռարձակվում է նաև Հայաստանի հանրային հեռուստատեսության արբանյակային ալիքով: 

Եկեղեցական կյանք 08.07.2018 Վարդավառ


Հուլիսի 8-ը «Դեպի հայներնիք, դեպի Սուրբ էջմիածին» հավաքի վերջին օրն էր: Այն համընկավ Պայծառակերպության տոնի հետ: Տոնական պատարագը Երևանի սբ. Գրիգոր Լուսավորիչ եկեղեցում մատուցեց Հովնան սրբազանը: Պատարագին Մայր աթոռի միաբանների ուղեկցությամբ մասնակցում էր Վեհափառ հայրապետը: Նա վարդաջրով ցողեց հավատացյալներին և օրհնեց նրանց: Հավաքի վերջին օրը երիտասարդները այցելեցին Ծիծեռնակաբերդ՝ հարգանքի տուրք մատուցելու Ցեղասպանության զոհերի հիշատակին:
Հուլիսի 7-ին ՀԵՀԵՄ-ն իր հավաքը շարունակեց Ծաղկաձորում: Հավաքի 400 անդամները հոգևորականների հետ երգելով հասան մինչև Կեչառիս վանական համալիր:  Երեկոյան երիտասարդները հանդիպեցին ՀՀ նախագահ Արմեն Սարգսյանի հետ: ՀԵՀԵՄ կենտրոնական գրասենյակի տնօրեն Գևորգ Մկրտչյանն իր ընկերներներին տեղեկացրեց, որ  Գարեգին Բ Ամենայն հայոց հայրապետի տնօրինությամբ՝ Սուրբ Աննա եկեղեցուն կից կաթողիկոսական նստավայրը հատկացվել է ՀԵՀԵՄ-ին:
Հինգ տարի առաջ ԱՀԹ-ում ձևավորվեց Վարդավառի նախատոնակը նշելու ուրախ ավանդույթը: Արարատյան Հայրապետական թեմի երիտասարդաց միության անդամները, Երևանի քաղաքապետարանի աջակցությամբ քայլերթ են կազմակերպում դեպի Մանկական զբոսայգի՝ երգ ու պարով, ժողովրդական խաղիկներով: Մանկական զբոսայգում նախատոնակի մասնակիցներին միացան անցորդներ, զբոսաշրջիկներ, զբոսայգում հանգստացող մարդիկ: 
Այսօր նշվում է Հայ առաքելական եկեղեցու հինգ տաղավար տոներից երրորդը՝ Պայծառակերպության կամ Վարդավառի տոնը: Մեր եկեղեցին այն նշում է Սուրբ Հարության տոնից 98 օր հետո, հունիսի 28-ից օգոստոսի 1-ն ընկած ժամանակահատվածում: Միածնաէջ Մայր տաճարում տոնական պատարագը մատուցեց Մայր Աթոռի միաբան Մինաս աբեղա Հախվերդյանը: 
Պայծառակերպության տոնին նշվում է նաև Հովհանավանքի ուխտի օրը: Ավանդույթի սկիզբը Գարեգին Բ հայրապետն է դրել: Այն նշվում է   2013 թվականից, հենց այդ ժամանակ է առաջին անգամ Մայր Աթոռից  դուրս բերվել Սուրբ Հովհաննես Մկրտչի մասունքներն ամփոփող արծաթյա մասնատուփն ու տարվել Հովհանավանք: Ըստ ավանդության,  Գրիգոր Լուսավորիչ հայրապետը վանքը հիմնել է Հովհաննես Մկրտչի մասունքների վրա: Մեծաթիվ հավատացյալներ եկել էին մասնակցելու տոնական պատարագին և արժանանալու  Սուրբ Հովհաննես Մկրտչի մասունքի օրհնությանը:
 

Եկեղեցական կանք 06.07.2018


Ծաղկաձորում իրենց աշխատանքը շարունակող Հայ եկեղեցու համաշխարհային երիտասարդաց միավորման անդամներին հուլիսի 4-ին հյուր էր գնացել Գարեգին Բ Ամենայն հայոց կաթողիկոսը:
Գարեգին Բ Ամենայն հայոց կաթողիկոսը 2018 թվականը հռչակել է երիտասարդության տարի: Ծրագրերից գլխավորը «Դեպի հայրենիք, դեպի Ս. Էջմիածին» համահայկական երիտասարդական ծրագիրն է: Հուլիսի 4-ից հայ եկեղեցու աշխարհասփյուռ թեմերից 400 երիտասարդ է հայրենիքում:  
Այսօր՝ հուլիսի 6-ի առավոտյան շուրջ երկու տասնյակ մարդ ներխուժել է Մայր Աթոռ Ս. Էջմիածնի Դիվանատան շենք: Վերջնագրային պահանջներով և սադրիչ գործողություններով նրանք խաթարել են վարչական մասի աշխատանքային առօրյան: 
Մայր Աթոռում, ի պատասխան հնչեցված անհիմն մեղադրանքների, ցուցադրվել է Սուրբ Գեղարդը: 
Օձունում մեկնարկել է ավանդական դարձած բակային վրանային հոգևոր ճամբարը: Արագածոտնի թեմի 15-30 տարեկան ավելի քան 100 երիտասարդ մեկ շաբաթով հյուրընկալվել է Օձունի Ս. Աստվածածին վանական համալիրում: 
Հուլիսի 1-ին, Ախալքալաքի Կուլիկամ գյուղում, Վիրահայոց թեմի առաջնորդ Վազգեն եպիսկոպոս Միրզախանյանի ձեռամբ, վերաօծվեց Սուրբ Երրորդություն եկեղեցին: 
Արդեն երրորդ անգամ ճապոնացի վերականգնողները այցելում են Մայր Աթոռ Սուրբ Էջմիածին: Այցի առիթը գործվածքների կարատեսակների վերականգնման դասընթացն էր:
Էջմիածնի «Էօրնեկեան» հանրակրթական դպրոցում տեղի ունեցավ դպրոցի շնորհաշատ ուսուցիչ Յուրի Գալստյանի հեղինակած թվով 3-րդ գրքի շնորհանդեսը: Ֆիզիկայի խնդիրների լուծման մեթոդական ձեռնարկը ստեղծված է թե՛ աշակերտների, թե՛ ուսուցիչների համար: 
Մայր Աթոռի սոցիալական ծառայության նախաձեռնությամբ Խարբերդի մասնագիտացված մանկատան 40 երեխա հուլիսի 3-ին եկել էր դիտելու «Թզուկ-Մզուկը» ներկայացումը: 
 

Եկեղեցական կյանք 02.07.2018


Քրիստոսի 12 առաքյալների և Ս. Պողոս առաքյալի հիշատակության տոնին Երևանի Սուրբ Երրորդություն եկեղեցում հավաքված ուխտավորներին անսպասելիորեն միացավ Գարեգին Երկրորդ Ամենայն հայոց կաթողիկոսը, խոսեց օրվա խորհրդի ու բոլոր ժամանակներում ի Քրիստոս մեր ունեցած սիրո մասին: 
Հունիսի 30-ին, Տասներկու առաքյալների և Պողոսի հիշատակության տոնին Մայր Աթոռում մատուցվեց պատարագ, հնչեցին առաքյալների վարքը փառաբանող շարականներ: 
Քրիստոսի 12 առաքյալների և Ս. Պողոս առաքյալի հիշատակության տոնին Քրիստոնեական դաստիարակության կենտրոնի նախաձեռնությամբ Սուրբ Տրդատի անունը կրող Բաց խորանի առջև համերգային ծրագրով ներկայացան Էջմիածնի «Հրաչ և Սյուզան Թուֆայան» հայորդյաց տան սաները: Տոնին մասնակցում էին նաև քաղաքի և մոտակա գյուղերի փոքրիկները, որոնք իրենց կավճանկարներով գունավորում էին Բաց խորանի հարակից տարածքը: Սուրբ առաքյալների տոնի խորհուրդը ներկաների համար մեկնաբանեց Զաքարիա ծայրագույն վարդապետ Բաղումյանը: Տոնի մասնակիցներին շուտով միացավ նաև Ամենայն հայոց կաթողիկոսը: 
Հունիսի 30-ին Հայ եկեղեցու տարբեր թեմերից ծխական համայնքի անդամներ, ուխտավորներ իրենց հոգևոր առաջնորդների հետ վաղ առավոտից ժամանում էին Մայր Աթոռ՝ ստանալու Գարեգին Բ Ամենայն հայոց կաթողիկոսի հայրական օրհնությունը: Հովվապետն ընդունեց Շիրակի, Գեղարքունիքի, Գուգարաց, Տավուշի և Սյունիքի թեմերի հարյուրավոր ուխտավորների: Հայոց հովվապետն ուրախությամբ նշեց, որ անսասան են թեմերի անմնացորդ սերն ու նվիրումը հայոց հոգևոր կենտրոնի հանդեպ: Գարեգին Բ-ը հորդորեց ուխտավորներին՝ անսասան մնալ հավատքի մեջ, ամուր պահել ընտանիքները, կենսունակ՝  ազգային մշակութային հաստատությունները, լուսավոր ու պայծառ՝  դպրոցներն ու եկեղեցիները: 
Ամեն ամառ՝ ուսումնական տարվա ավարտից հետո, Գևորգյան հոգևոր ճեմարանի սաներն ու դասախոսները ուղևորվում են դեպի Հայաստանի սրբատեղիներից որևէ մեկը: Այս տարի ճեմարանականներն ընտրել էին Տավուշի սահմանամերձ մարզը: 
 

Եկեղեցական կյանք 29.06.2018


ՅՈՒՆԵՍԿՕ-ի նախաձեռնությամբ Մաշտոցի անվան Մատենադարանում մեկնարկեց Ձեռագրերի և արխիվային փաստաթղթերի պահպանման և վերականգնման վերապատրաստման դասընթացը, որին մասնակցում էր սիրիացի ութ փորձագետ: Դասընթացն իրականցվում է «Սիրիայի մշակութային ժառանգության անհապաղ պաշտպանության» շրջանակում:
Սեպտեմբերին Նյու Յորքի Մետրոպոլիտեն թանգարանում ներկայացվելու են Մայր Աթոռում պահվող 4-18 դարերի նվիրական նշանակության սրբություններ, պատմամշակութային արժեքներ՝ գործվածքներ, ձեռագրեր, եկեղեցական պարագաներ, մասունքներ:
Հունիսի 29-ին Գևորգյան հոգևոր ճեմարանում ավարտաճառերի պաշտպանություն էր: Այս տարի ճեմարանն ունեցավ 27 շրջանավարտ: 
Գրողների միությունում տեղի ունեցավ Թովմա քահանա Անդրեասյանի «Մայկոպյան օրագիր»-ը գրքի շնորհանդեսը: 
Միջազգային լուրեր- Վաշինգթոնում մեկնարկել է սմիթսոնյան «Ֆոլքլայֆ» փառատոնը, որն այս տարի նվիրված է Հայաստանին և Կատալոնիային: Հունիսի 28-ին Քեմբրիջի դուքսը` Անգլիայի արքայազն Ուիլյամն այցելել է Սուրբ երկիր, Տիրոջ Հարության տաճարում իշխանին դիմավորել են տաճարի իրավատեր երեք համայնքների հոգևոր պետերը:                Հունիսի 28-ին Հռոմի Սուրբ Պետրոս տաճարում Ֆրանցիսկոս պապը ձեռնադրել է 14 կարդինալ: Նիդերլանդական սենատը հավանություն է տվել հասարակական վայրերում նիկաբ կրելն արգելող օրինագծին. այժմ երկրում արգելվում է կրել փարաջա, նիկաբ, չադրա կամ դեմքը ծածկող այլ հագուստ: Օրինախապտները կտուգանվեն 400 եվրոյի չափով:
Հունիսի 27-ին «Նոյան Տապան» լրատվական կենտրոնը ասուլիս էր կազմակերպել, որին մասնակցում էին «Նոր Հայաստան, նոր հայրապետ» նախաձեռնության անդամներ Կարեն Պետրոսյանը, Կորյուն աբեղա Առաքելյանը, Մանվել Մանուկյանը, Արտակ Ալավերդյանը: Ասուլիսը ձախողվեց, որի համար բանախոսները մեղադրեցին լրագրողներին:
 

 

Եկեղեցական կյանք 25.06.2018


Հունիսի 23-ին Ամենայն հայոց հայրապետն ընդունեց ԱՄՆ Հայոց Արևմտյան թեմից հայրենիք եկած ուխտավորներին: Նրանք Կալիֆորնիա նահանգի Սանտա Կլարիտա քաղաքից էին։ 
Մալաթիայի հայորդյաց տան հաշվետու համերգին հյուրընկալվել էր Գարեգին Բ Ամենայն հայոց կաթողիկոսը: Ելույթ ունեցան նախ կրթօջախի  թատերական, ապա նաև երաժշտական բոլոր խմբերը: 
Տրդատ Երրորդ թագավորի, Աշխեն թագուհու և թագավորի քույր Խոսրովիդուխտ կույսի հիշատակության օրը մեր եկեղեցին այս տարի նշեց հունիսի 23-ին: Սուրբ Գրիգոր Լուսավորիչ մայր տաճարի Սուրբ Տրդատ և Սուրբ Աշխեն մատուռներում, որտեղ մինչ օրս պատարագ չէր մատուցվել, առաջին պատարագիչը Առնակ քահանա Հարությունյանն էր:
Հունիսի 24-ին՝ Հոգեգալստյանը հաջորդող 5-րդ կիրակին 2016 թվականից հռչակված է Հայրավանքի ուխտի օր։ Արդեն երկրորդ անգամ այս օրը վանք բերվեց Փրկչի խաչափայտի մասունքը:  
Մայր Աթոռի «Ռուբեն Սևակ» թանգարանում հունիսի 24-ին «Ռոմանտիզմը և Այվազովսկին» թեմայով դասախոսությունն էր։ Բանախոսը արվեստաբան Գայանե Հովհաննիսյանն էր: 
Օձունի սբ. Աստվածածին եկեղեցում, Գուգարաց թեմի առաջնորդ Սեպուհ արք. Չուլջյանի օրհնությամբ, մեկնարկեց «Հոգևոր երգեր» մարզային երկրորդ փառատոնը: Առաջին օրը ելույթ ունեցան Երևանի «ՆարԷ» և Վանաձորի Կոմիտասի անվան արվեստի դպրոցի երգչախմբերը: 
 

Եկեղեցական կյանք 22.06.2018


Հունիսի 21-ին Օշականում նշվեց Ս. Սահակ Պարթևի և Ս. Մեսրոպ Մաշտոցի հիշատակի տոնը: 
«Գարեգին Ա» կրթական կենտրոնում հունիսի 22-ին Վեհափառ hայրապետն ընդունեց Մայր Աթոռ եկած ուխտավորների: Նրանք Մասիս քաղաքի սբ. Գևորգ եկեղեցու համայնքի ներկայացուցիչներ և ՀՕՖ-ի Երեխաների աջակցության կենտրոնի սաներն էին: 
Ամենայն hայոց կաթողիկոսի տնօրինությամբ՝ հունիսի 21-ին Տ. Կորյուն աբեղա Առաքելյանն ազատվել է Ս. Գայանե վանքի վանահոր պարտականությունից: Մայր Աթոռի լուսարարապետությունը կապահովի հայր Կորյունի կեցությունը մայրավանքում: Մայր Աթոռ Սուրբ Էջմիածնի Կարգապահական հանձնախմբին հանձնարարական է տրվել նաև քննության առնել Տ. Կորյուն աբեղա Առաքելյանի հետ առնչված խնդիրները: Նորին սրբության տնօրինությամբ՝ Ս. Գայանե վանքի վանահայր է նշանակվել Տ. Մատթեոս վարդապետ Պողոսյանը:
Մայր Աթոռի հովանու ներքո գործող Գյումրիի «Թչունյան տուն» կրթահամալիր մանկատանը 2-18 տարեկան շուրջ 102 երեխա է ապրում և ուսանում: Օրերս այս տան բնակիրչներին հյուրընկալվեց Վարդան եպիսկոպոս Նավասարդյանը: 
Լուրեր հայոց թեմերից- Հունիսի 17-ին Կանադա է տարվել սուրբ Հակոբ Մծբնա սքանչելագործ հայրապետի մասունքը: 
Հունիսի 21-ին հայ առաքելական եկեղեցու սրբոց Թարգմանչաց տոնը նշվեց նաև Վիրահայոց թեմում: 
Մայիս ամսվա վերջից մինչ հուլիսի կեսերը Մայր Աթոռի հովանավորությամբ գործող հայորդյաց տներում հաշվետու միջոցառումների շրջան է: Գյումրիի Հայորդաց տան հաշվետու համերգին  հյուրընկալվել էր Մայր Աթոռ Սուրբ Էջմիածնի Քրիստոնեական դաստիարակության կենտրոնի տնօրեն Վարդան եպիսկոպոս Նավասարդյանը:
Միջազգային լուրեր- Շվեդիայի Ստոկհոլմ քաղաքում կայացել է Սիրիայի հոգևոր մշակույթը ուսումնասիրողների միջազգային կոնֆերանսը: Երուսաղեմի երեք հոգևոր առաջնորդները նամակ են հղել Իսրայելի վարչապետին` քննարկվող վիճելի օրինագծի կապակցությամբ: Խոսքը եկեղեցական սեփականության բռնագրավման հնարավորության մասին է:
Վատիկանի սրբադասման հարցերով կոնգրեգացիայի պրեֆեկտ կարդինալ Անջելո Ամատոն այս ամիս նշել է 80-ամյակը: Այս հոբելյանով պակասել է նոր պապ ընտրելու դեպքում հավաքվող կոնկլավի մասնակիցների թիվը` հասնելով 114-ի: 
 

Եկեղեցական կյանք 18.06.2018


Հունիսի 16-ին Ամենայն hայոց Գարեգին Բ կաթողիկոսն այցելել էր Մայր Աթոռի հովանու ներքո գործող «Իզմիրլյան» բժշկական կենտրոն: Այդ օրը արցախյան ազատամարտի և ապրիլյան քառօրյա պատերազմի 15 մասնակիցներ բուժզննում անցան Գերմանիայի առաջատար «Օթթոբոք» կլինիկայի Հնդկաստանի մասնաճյուղի վնասվածքաբանների կողմից, հետագայում այնտեղ պրոթեզավորում ստանալու հեռանկարով: 
Հունիսի 17-ին Վեհափառ հայրապետին էին այցելել ԱՄՆ Հայոց արևմտյան և արևելեյան թեմերից եկած ուխտավոր ընտանիքներ: Նորին սրբությունը կարևորեց այն փաստը, որ ծնողները հայրենիք են բերում զավակներին, անմիջական կապ ստեղծում նրանց հայկական ինքնության հետ: 
Հունիսի 17-ին, կիրակնօրյա պատարագից հետո, Կաթողիկոսի հրաժարականը պահանջող նախաձեռնության անդամները հանդիպել են Շիրակի թեմի առաջնորդ Միքայել եպիսկոպոս Աջապահյանի հետ՝ ակնկալելով, որ առաջնորդը իրենց պահանջները կփոխանցի Գարեգին Բ-ին: 1 ժամ 12 րոպե տևած բուռն հանդիպման ընթացքում, Միքայել սրբազանը պատասխանել է նախաձեռնության անդամների հարցերին, անդրադարձել հնչեցված մեղադրանքների՝ դրանց մեծ մասը որակելով անհիմն: Սրբազանը մեկ անգամ ևս նախաձեռնության ղեկավար հոգևորականին և մյուս անդամներին սթափության կոչ է արել՝ նրանց գործունեությունը որակելով աղանդավորական:
Օրերս Մայր Աթոռի թանգարանային ֆոնդը համալրվել է պատմական և գեղարվեստական նշանակություն ունեցող երեք ծածկոցներով: Դրանք Մայր Աթոռին է նվիրաբերել Մարսելի Սուրբ Թադեոս և Բարդուղիմեոս եկեղեցին: Ծածկոցները Կապադովկիայի Կեսարիա քաղաքի շրջակայքում գտնված վանքերից փրկված մասունքներ են, որոնք գաղթականները տարել են իրենց հետ:
Էջմիածնի հայորդյաց տան քանոնի դասարանի սաները Մակար Եկմալյանի անվան երաժշտական դպրոցում ուսումնական տարին ամփոփեցին համերգային ծրագրով: Հայորդյաց տան սաները երաժշտական դպրոցի սաների հետ ներկայացան բազմաժանր ծրագրով: 
 

Եկեղեցական կյանք 15.06.2018


Հունիսի 14-ին երկօրյա պաշտոնական այցով Մոսկվայում գտնվող ՀՀ վարչապետ Նիկոլ Փաշինյանը տիկնոջ հետ այցելեց Մոսկվայի հայկական եկեղեցական համալիր: Ռուսաստանի և Նոր Նախիջևանի թեմակալ առաջնորդ Եզրաս արքեպիսկոպոս Ներսիսյանի և հոգևոր դասի ուղեկցությամբ վարչապետը եղավ Սուրբ Պայծառակերպության եկեղեցում, այցելել համալիրի տարածքում գործող «Տապան» թանգարան, Գրիգոր Նարեկացու անվան նորակառույց վարժարան:
Հունիսի 14-ին Գարեգին Բ հայրապետը Մայր Աթոռում հյուրընկալեց Անտիոքի հույն ուղղափառ Եկեղեցու` Զահլեի և Բաալբեքի միտրոպոլիտ Անտոնիոս Էլ Սոուրիին և բարերար Նիկոլա Աբու Ֆեյսալին:  «Պահապան» հիմնադրամի միջոցներով չորրորդ խաղաթաքստոցը բացվեց սահմանապահ Այգեպարում: Այս թաքստոցի նորոգմանն աջակցել է Հոլանդիայի հայ համայնքը: Տավուշի թեմի առաջնորդ Բագրատ եպիսկոպոս Գալստանյանը ողջունեց Հոլանդիայից ժամանած հյուրերին, որոնց մեջ էր նաև միջազգային իրավունքի՝ Հոլանդիայում հայտնի մասնագետ Անտոն Վան Կամտաուտան:
Գևորգյան հոգևոր ճեմարանի նախասրահում բացվեց «Արարող ձեռքեր» ցուցահանդեսային նախագծի 6-րդ ցուցադրությունը: Այս անգամ իրենց ստեղծագործություններն են ներկայացրել Գեղարվեստի ակադեմիայի ուսանողներ Վիկտորիա Շահբազյանն ու Մերի Եփրեմյանը: Քաշաթաղում նշվեց Բերձորի Սուրբ Համբարձման եկեղեցու օծման 20- ամյակը: 
Լրահոս- Պոլսի Գատըգյուղ թաղամասում տեղի են ունեցել հանդիսություններ` նվիրված Կաթողիկե Սուրբ Էջմիածնի տոնին: 
Հունիսի 3-ին Ուկրաինայի հայոց թեմի առաջնորդ Մարկոս եպիսկոպոս Հովհաննիսյանն օծել է Բելգորոդ-Դնեստրովսկ քաղաքի Սուրբ Աստվածածնի Վերափոխում հայկական եկեղեցու զանգերը: 
Հունիսի 10-ին Երուսաղեմի հայոց պատրիարք Նուրհան արքեպիսկոպոսի ձեռամբ օծվել է Նոր Երուսաղեմի Ս. Գրիգոր Լուսավորիչ եկեղեցին: 
 

Եկեղեցական կյանք 11.06.18


Հունիսի 9-ին, Մայր Աթոռի Սրբոց Հրեշտակապետաց եկեղեցում 12 սարկավագների քահանայական ձեռնադրության նախորդ օրը ընծայման կարգ կատարվեց: 
Հունիսի 10-ին Ամենայն հայոց հայրապետի նախագահությամբ մայրաքաղաքի Ս. Գրիգոր Լուսավորիչ մայր եկեղեցում տեղի ունեցավ 12 ընծայյացուների քահանայական ձեռնադրությունը: 
12 սարկավագների քահանայական ձեռնադրության և պատարագի ավարտին անսովոր լարված մթնոլորտ էր Ս. Գր. Լուսավորիչ եկեղեցու բակում: «Նոր Հայաստան, նոր հայրապետ» նախաձեռնության մի խումբ ցուցարարներ, հայր Կորյունի և Կարեն Պետրոսյանի առաջնորդությամբ, փորձեցին Հայրապետի հրաժարականի պահանջներ հնչեցնել: Ի պատասխան՝ եկեղեցու բակում հավաքված հավատացյալների բազմությունը հայրապետական մաղթանքի երգեցողությամբ և «վեհափառ» վանկարկումներով ուղեկցեց Գարեգին Բ Ամենայն հայոց կաթողիկոսին: 
Էստոնիայում լույս է տեսել սուրբ Գրիգոր Նարեկացու «Մատյանը»` էստոներեն: Այն թարգմանել է էստոնացի հայտնի կոմպոզիտոր Պեետեր Վոլկոնսկին:
Սեպտեմբերի 21-ին «Հայաստան» խորագրով ցուցադրություն կբացվի Նյու Յորքի «Մետրոպոլիտեն» թանգարանում: 4-17-րդ դարերի հայ պատմամշակութային ժառանգության մասին կպատնեն ավելի քան 130 ցուցանմուշներ, որոնք տրամադրելու են մաշտոցյան մատենադարանը, Հայաստանի պատմության և Մայր Աթոռ Սուրբ Էջմիածնի թանգարանները: 
Մայր Աթոռի հրատարակչատունը լույս է ընծայել «Քարոզգիրք: Արարատի ժառանգությունը» շարքի երկրորդ հատորը: Այն Մայր Աթոռ Ս. Էջմիածնի պաշտոնական պարբերական հանդիսացող «Արարատ» ամսագրում հրատարակված թարգմանական քարոզների համահավաք ժողովածու է:
 

Եկեղեցական կյանք 8.06.2018


Հունիսի 5-ին, «Նոր Հայաստան, նոր հայրապետ» նախաձեռնության ֆեյսբուքյան էջում հայտարարություն տարածվեց, որում պահանջվում էր նոր Հայաստանում նոր կաթողիկոսական ընտրություններ կատարել: Նախաձեռնության անդամներն իրենց համակիրներին հրավիրեցին հավաքվել Երևանի Սուրբ Աննա եկեղեցու բակում: Կոչին սակավաթիվ մարդիկ արձագանքեցին: Նախաձեռնող խմբի անդամները հունիսի 7-ին Գարեգին Բ Ամենայն հայոց կաթողիկոսի հրավերով Մայր Աթոռ Սուրբ Էջմիածնում հանդիպեցին Վեհափառի և եպիսկոպոսների հետ: 
Եպիսկոպոսաց դասը, իբրև հիմնական երաշխավորը Հայ եկեղեցու կանոնական կարգի և Ամենայն հայոց կաթողիկոսի հանգամանքի անձեռնամխելիության, հաստատում է, որ կաթողիկոսի հրաժարականը՝ արտաքին և բռնի միջամտության միջոցով պարտադրված, հակականոնական է, ուստի և անվավեր: Հունիսի 8-ին Մայր Աթոռ Սուրբ Էջմիածնում տեղի է ունեցել եպիսկոպոսաց ժողով, որին մասնակցում էին Հայաստանում պաշտոնավարող եպիսկոպոսները և Գերագույն հոգևոր խորհրդի աշխարհական անդամները: Ժողովը հանդես է եկել հայտարարությամբ: 
Ամենայն հայոց հայրապետն ընդունեց ԱՎՐՈՐԱ մարդասիրական նախաձեռնության այս տարվա մրցանակի հավակնորդներներին: 
Նուբարաշենի թիվ 11 հատուկ գիշերօթիկ դպրոցի 22 երեխաներ մկրտվել են Նուբարաշենի Սրբոց Նահատակաց եկեղեցում:
Էմիլ Լահուդը՝ Լիբանանի նակխին նախագահը պատմում է իր հայկական արմատների, դաստիրակության և ռազմական ու քաղաքական գործունեության մասին: 
 

Եկեղեցական կյանք 04.06.2018


Հունիսի 3-ին Հայ եկեղեցին նշեց Կաթողիկե Սուրբ Էջմիածնի տոնը: 
Հունիսի 2-ին Սաղմոսվան գյուղում բացվեց հայորդյաց տուն, օրհնության կարգը կատարեց Գարեգին Բ հայրապետը: 
Հունիսի 3-ին՝ Կաթողիկե Սուրբ Էջմիածնի տոնի օրը Արմավիրի մարզի Աղավնատուն գյուղի Սուրբ Աննա եկեղեցու բակի 17 խաչքարերին ավելացավ ևս մեկը՝ նվիրված ապրիլյան պատերազմի հերոսներին: 
Հունիսի 2-ին Մասիսի Ս. Գևորգ եկեղեցում Տ. Աշոտ քահանա Սաֆարյանը մկրտեց Հայ օգնության ֆոնդի «Երեխաների աջակցության կենտրոն» հիմնադրամի շահառու 7 երեխաների:  
Հունիսի 2-4-ը Եկեղեցիների համաշխարհային խորհրդի հայաստանյան միջեկեղեցական բարեգործական «Կլոր սեղան» հիմնադրամի օժանդակությամբ Աղվերանում անցկացվեց «Զինծառայողներին հոգևոր և հոգեբանական կայունության ապահովում» խորագրով եռօրյա սեմինարը: Վերապատրաստմանը մասնակցում էին տարբեր զորամասերում սպասավորող գնդերեցներ և հոգեբաններ: 
Վանաձորում, Վազգեն Սարգսյանի կիսանդրու հանդիպակաց մայթին տեղադրվել է տուֆակերտ խաչքար: Այն նվիրված է 1992-ի մայիս-հունիսյան հաղթանակների օրերին լեգենդար 5-րդ մոտոհրաձգային գնդի զոհված մարտիկների հիշատակին: 
 

Եկեղեցական կյանք 01.06.2018


Հունիսի 1-ին ՀՀ վարչապետ Նիկոլ Փաշինյանն այցելել է Մայր Աթոռ Սուրբ Էջմիածին, հանդիպել հերթական քառօրյա ժողովն անցկացնող Գերագույն հոգևոր խորհրդի անդամների հետ: Զրույցն ացել է անկաշկանդ և գործնական մթնոլորտում, պետություն-եկեղեցի նոր, առավել խորը և ընդգրկուն հարաբերությունների, ինչպես նաև՝ հայապահպանության գործում եկեղեցու դերի ընդլայնման մասին:
Ավարտվեցին Ս. Էջմիածնում ընթացող Գերագույն հոգևոր խորհրդի նիստերը: Այսօր՝ հունիսի 1-ին Գերագույն հոգևոր խորհրդի անդամներն այցելեցին Սարդարապատի հուշահամալիր: 
Մայիսի 31-ին Մայր Աթոռ Սուրբ Էջմիածնի Գերագույն հոգևոր խորհրդի անդամներն այցելեցին Ծիծեռնակաբերդ: Հայոց հայրապետի հանդիսապետությամբ կատարվեց բարեխոսական կարգ: Աղոթք բարձրացվեց Ցեղասպանության սուրբ նահատակների հիշատակին:
Մայիսի 31-ին մեր եկեղեցին տոնախմբեց Ս. Հովհաննես Մկրտչի և Աթանագինե եպիսկոպոսի հիշատակության օրը: Ս. Հովհաննես Մկրտչի մասունքակիր խաչը Մայր տաճարից Շողակաթ վանք բերվեց, այդ օրը նաև այս եկեղեցու ուխտի օրն է:  
Հայաստանի, Արցախի և Սփյուռքի հայոց թեմերում ծառայող 23 քահանա երկշաբաթյա դաընթաց է անցնում Մայր Աթոռ Սուրբ Էջմիածնում:  Օրերս քահանաներին հանդիպեց Գարեգին Բ Ամենայն հայոց կաթողիկոսը: 
Քրիստոնեական դաստիարակության կենտրոնի նախաձեռնությամբ Մայր Աթոռում անցկացվեց կիրակնօրյա դպրոցների առաջին օլիմպիադան: Մասնակցում էր եկեղեցու հայաստանյան թեմերի 80 կիրակնօրյա դպրոց: 
Մայիսյան հերոսամարտերի և Հայաստանի առաջին հանրապետության 100 ամյա հոբելյանին նվիրված միջոցառումների շրջանակում Նորքի հայորդյաց տան սաները ներկայացրեցին <<Հոգիս>> պլաստիկ-երաժշտական ներկայացումը: 
Արտաշատ քաղաքի միակ՝ Ս. Հովհաննես Ավետարանիչ եկեղեցին օծվել է 2015-ին: Մինչև եկեղեցու բացվելը հարակից գյուղերի եկեղեցիներն են սպասարակել արտաշատցիներին: Արդեն 3 տարի գործող սբ. Հովհաննեսը, ըստ հոգևոր հովիվ տեր Թաթուլի, դարձել է սիրելի աղոթատեղի քրիստոնյա ժողովրդի համար: Մայիսի 30-ը Արտաշատի Ս. Հովհաննես Ավետարանիչ եկեղեցու ուխտի օրն էր: