«Եկեղեցական կյանք» լրատվական թողարկումը ներկայացնում է Հայ Առաքելական եկեղեցու գործունեությունը կրթական, մշակութային, հասարակական, առողջապահական և այլ ոլորտներում, անդրադառնում եկեղեցական տոներին, պատմում թեմերին կից գործող հասարակական կառույցների, երիտասարդական շարժումների, հայորդյաց տների գործունեության մասին: Ներկայացնում է Մայր Աթոռ Սուրբ Էջմիածնի հոգևոր ծառայությունը, Հայ եկեղեցու և հայ հավատացյալի համայնքային կյանքը հայրենիքում և արտասահմանյան թեմերում:
Պարբերականությունը՝ ամեն երկուշաբթի և ուրբաթ, ժամը 19:30-ին և 21:30-ին
Կրկնությունը՝ երեքշաբթի և շաբաթ, ժամը 08:00-ին և 10:30-ին
Հեռարձակվում է նաև Հայաստանի հանրային հեռուստատեսության արբանյակային ալիքով: 

Եկեղեցական կյանք 15.06.2018


Հունիսի 14-ին երկօրյա պաշտոնական այցով Մոսկվայում գտնվող ՀՀ վարչապետ Նիկոլ Փաշինյանը տիկնոջ հետ այցելեց Մոսկվայի հայկական եկեղեցական համալիր: Ռուսաստանի և Նոր Նախիջևանի թեմակալ առաջնորդ Եզրաս արքեպիսկոպոս Ներսիսյանի և հոգևոր դասի ուղեկցությամբ վարչապետը եղավ Սուրբ Պայծառակերպության եկեղեցում, այցելել համալիրի տարածքում գործող «Տապան» թանգարան, Գրիգոր Նարեկացու անվան նորակառույց վարժարան:
Հունիսի 14-ին Գարեգին Բ հայրապետը Մայր Աթոռում հյուրընկալեց Անտիոքի հույն ուղղափառ Եկեղեցու` Զահլեի և Բաալբեքի միտրոպոլիտ Անտոնիոս Էլ Սոուրիին և բարերար Նիկոլա Աբու Ֆեյսալին:  «Պահապան» հիմնադրամի միջոցներով չորրորդ խաղաթաքստոցը բացվեց սահմանապահ Այգեպարում: Այս թաքստոցի նորոգմանն աջակցել է Հոլանդիայի հայ համայնքը: Տավուշի թեմի առաջնորդ Բագրատ եպիսկոպոս Գալստանյանը ողջունեց Հոլանդիայից ժամանած հյուրերին, որոնց մեջ էր նաև միջազգային իրավունքի՝ Հոլանդիայում հայտնի մասնագետ Անտոն Վան Կամտաուտան:
Գևորգյան հոգևոր ճեմարանի նախասրահում բացվեց «Արարող ձեռքեր» ցուցահանդեսային նախագծի 6-րդ ցուցադրությունը: Այս անգամ իրենց ստեղծագործություններն են ներկայացրել Գեղարվեստի ակադեմիայի ուսանողներ Վիկտորիա Շահբազյանն ու Մերի Եփրեմյանը: Քաշաթաղում նշվեց Բերձորի Սուրբ Համբարձման եկեղեցու օծման 20- ամյակը: 
Լրահոս- Պոլսի Գատըգյուղ թաղամասում տեղի են ունեցել հանդիսություններ` նվիրված Կաթողիկե Սուրբ Էջմիածնի տոնին: 
Հունիսի 3-ին Ուկրաինայի հայոց թեմի առաջնորդ Մարկոս եպիսկոպոս Հովհաննիսյանն օծել է Բելգորոդ-Դնեստրովսկ քաղաքի Սուրբ Աստվածածնի Վերափոխում հայկական եկեղեցու զանգերը: 
Հունիսի 10-ին Երուսաղեմի հայոց պատրիարք Նուրհան արքեպիսկոպոսի ձեռամբ օծվել է Նոր Երուսաղեմի Ս. Գրիգոր Լուսավորիչ եկեղեցին: 
 

Եկեղեցական կյանք 11.06.18


Հունիսի 9-ին, Մայր Աթոռի Սրբոց Հրեշտակապետաց եկեղեցում 12 սարկավագների քահանայական ձեռնադրության նախորդ օրը ընծայման կարգ կատարվեց: 
Հունիսի 10-ին Ամենայն հայոց հայրապետի նախագահությամբ մայրաքաղաքի Ս. Գրիգոր Լուսավորիչ մայր եկեղեցում տեղի ունեցավ 12 ընծայյացուների քահանայական ձեռնադրությունը: 
12 սարկավագների քահանայական ձեռնադրության և պատարագի ավարտին անսովոր լարված մթնոլորտ էր Ս. Գր. Լուսավորիչ եկեղեցու բակում: «Նոր Հայաստան, նոր հայրապետ» նախաձեռնության մի խումբ ցուցարարներ, հայր Կորյունի և Կարեն Պետրոսյանի առաջնորդությամբ, փորձեցին Հայրապետի հրաժարականի պահանջներ հնչեցնել: Ի պատասխան՝ եկեղեցու բակում հավաքված հավատացյալների բազմությունը հայրապետական մաղթանքի երգեցողությամբ և «վեհափառ» վանկարկումներով ուղեկցեց Գարեգին Բ Ամենայն հայոց կաթողիկոսին: 
Էստոնիայում լույս է տեսել սուրբ Գրիգոր Նարեկացու «Մատյանը»` էստոներեն: Այն թարգմանել է էստոնացի հայտնի կոմպոզիտոր Պեետեր Վոլկոնսկին:
Սեպտեմբերի 21-ին «Հայաստան» խորագրով ցուցադրություն կբացվի Նյու Յորքի «Մետրոպոլիտեն» թանգարանում: 4-17-րդ դարերի հայ պատմամշակութային ժառանգության մասին կպատնեն ավելի քան 130 ցուցանմուշներ, որոնք տրամադրելու են մաշտոցյան մատենադարանը, Հայաստանի պատմության և Մայր Աթոռ Սուրբ Էջմիածնի թանգարանները: 
Մայր Աթոռի հրատարակչատունը լույս է ընծայել «Քարոզգիրք: Արարատի ժառանգությունը» շարքի երկրորդ հատորը: Այն Մայր Աթոռ Ս. Էջմիածնի պաշտոնական պարբերական հանդիսացող «Արարատ» ամսագրում հրատարակված թարգմանական քարոզների համահավաք ժողովածու է:
 

Եկեղեցական կյանք 8.06.2018


Հունիսի 5-ին, «Նոր Հայաստան, նոր հայրապետ» նախաձեռնության ֆեյսբուքյան էջում հայտարարություն տարածվեց, որում պահանջվում էր նոր Հայաստանում նոր կաթողիկոսական ընտրություններ կատարել: Նախաձեռնության անդամներն իրենց համակիրներին հրավիրեցին հավաքվել Երևանի Սուրբ Աննա եկեղեցու բակում: Կոչին սակավաթիվ մարդիկ արձագանքեցին: Նախաձեռնող խմբի անդամները հունիսի 7-ին Գարեգին Բ Ամենայն հայոց կաթողիկոսի հրավերով Մայր Աթոռ Սուրբ Էջմիածնում հանդիպեցին Վեհափառի և եպիսկոպոսների հետ: 
Եպիսկոպոսաց դասը, իբրև հիմնական երաշխավորը Հայ եկեղեցու կանոնական կարգի և Ամենայն հայոց կաթողիկոսի հանգամանքի անձեռնամխելիության, հաստատում է, որ կաթողիկոսի հրաժարականը՝ արտաքին և բռնի միջամտության միջոցով պարտադրված, հակականոնական է, ուստի և անվավեր: Հունիսի 8-ին Մայր Աթոռ Սուրբ Էջմիածնում տեղի է ունեցել եպիսկոպոսաց ժողով, որին մասնակցում էին Հայաստանում պաշտոնավարող եպիսկոպոսները և Գերագույն հոգևոր խորհրդի աշխարհական անդամները: Ժողովը հանդես է եկել հայտարարությամբ: 
Ամենայն հայոց հայրապետն ընդունեց ԱՎՐՈՐԱ մարդասիրական նախաձեռնության այս տարվա մրցանակի հավակնորդներներին: 
Նուբարաշենի թիվ 11 հատուկ գիշերօթիկ դպրոցի 22 երեխաներ մկրտվել են Նուբարաշենի Սրբոց Նահատակաց եկեղեցում:
Էմիլ Լահուդը՝ Լիբանանի նակխին նախագահը պատմում է իր հայկական արմատների, դաստիրակության և ռազմական ու քաղաքական գործունեության մասին: 
 

Եկեղեցական կյանք 04.06.2018


Հունիսի 3-ին Հայ եկեղեցին նշեց Կաթողիկե Սուրբ Էջմիածնի տոնը: 
Հունիսի 2-ին Սաղմոսվան գյուղում բացվեց հայորդյաց տուն, օրհնության կարգը կատարեց Գարեգին Բ հայրապետը: 
Հունիսի 3-ին՝ Կաթողիկե Սուրբ Էջմիածնի տոնի օրը Արմավիրի մարզի Աղավնատուն գյուղի Սուրբ Աննա եկեղեցու բակի 17 խաչքարերին ավելացավ ևս մեկը՝ նվիրված ապրիլյան պատերազմի հերոսներին: 
Հունիսի 2-ին Մասիսի Ս. Գևորգ եկեղեցում Տ. Աշոտ քահանա Սաֆարյանը մկրտեց Հայ օգնության ֆոնդի «Երեխաների աջակցության կենտրոն» հիմնադրամի շահառու 7 երեխաների:  
Հունիսի 2-4-ը Եկեղեցիների համաշխարհային խորհրդի հայաստանյան միջեկեղեցական բարեգործական «Կլոր սեղան» հիմնադրամի օժանդակությամբ Աղվերանում անցկացվեց «Զինծառայողներին հոգևոր և հոգեբանական կայունության ապահովում» խորագրով եռօրյա սեմինարը: Վերապատրաստմանը մասնակցում էին տարբեր զորամասերում սպասավորող գնդերեցներ և հոգեբաններ: 
Վանաձորում, Վազգեն Սարգսյանի կիսանդրու հանդիպակաց մայթին տեղադրվել է տուֆակերտ խաչքար: Այն նվիրված է 1992-ի մայիս-հունիսյան հաղթանակների օրերին լեգենդար 5-րդ մոտոհրաձգային գնդի զոհված մարտիկների հիշատակին: 
 

Եկեղեցական կյանք 01.06.2018


Հունիսի 1-ին ՀՀ վարչապետ Նիկոլ Փաշինյանն այցելել է Մայր Աթոռ Սուրբ Էջմիածին, հանդիպել հերթական քառօրյա ժողովն անցկացնող Գերագույն հոգևոր խորհրդի անդամների հետ: Զրույցն ացել է անկաշկանդ և գործնական մթնոլորտում, պետություն-եկեղեցի նոր, առավել խորը և ընդգրկուն հարաբերությունների, ինչպես նաև՝ հայապահպանության գործում եկեղեցու դերի ընդլայնման մասին:
Ավարտվեցին Ս. Էջմիածնում ընթացող Գերագույն հոգևոր խորհրդի նիստերը: Այսօր՝ հունիսի 1-ին Գերագույն հոգևոր խորհրդի անդամներն այցելեցին Սարդարապատի հուշահամալիր: 
Մայիսի 31-ին Մայր Աթոռ Սուրբ Էջմիածնի Գերագույն հոգևոր խորհրդի անդամներն այցելեցին Ծիծեռնակաբերդ: Հայոց հայրապետի հանդիսապետությամբ կատարվեց բարեխոսական կարգ: Աղոթք բարձրացվեց Ցեղասպանության սուրբ նահատակների հիշատակին:
Մայիսի 31-ին մեր եկեղեցին տոնախմբեց Ս. Հովհաննես Մկրտչի և Աթանագինե եպիսկոպոսի հիշատակության օրը: Ս. Հովհաննես Մկրտչի մասունքակիր խաչը Մայր տաճարից Շողակաթ վանք բերվեց, այդ օրը նաև այս եկեղեցու ուխտի օրն է:  
Հայաստանի, Արցախի և Սփյուռքի հայոց թեմերում ծառայող 23 քահանա երկշաբաթյա դաընթաց է անցնում Մայր Աթոռ Սուրբ Էջմիածնում:  Օրերս քահանաներին հանդիպեց Գարեգին Բ Ամենայն հայոց կաթողիկոսը: 
Քրիստոնեական դաստիարակության կենտրոնի նախաձեռնությամբ Մայր Աթոռում անցկացվեց կիրակնօրյա դպրոցների առաջին օլիմպիադան: Մասնակցում էր եկեղեցու հայաստանյան թեմերի 80 կիրակնօրյա դպրոց: 
Մայիսյան հերոսամարտերի և Հայաստանի առաջին հանրապետության 100 ամյա հոբելյանին նվիրված միջոցառումների շրջանակում Նորքի հայորդյաց տան սաները ներկայացրեցին <<Հոգիս>> պլաստիկ-երաժշտական ներկայացումը: 
Արտաշատ քաղաքի միակ՝ Ս. Հովհաննես Ավետարանիչ եկեղեցին օծվել է 2015-ին: Մինչև եկեղեցու բացվելը հարակից գյուղերի եկեղեցիներն են սպասարակել արտաշատցիներին: Արդեն 3 տարի գործող սբ. Հովհաննեսը, ըստ հոգևոր հովիվ տեր Թաթուլի, դարձել է սիրելի աղոթատեղի քրիստոնյա ժողովրդի համար: Մայիսի 30-ը Արտաշատի Ս. Հովհաննես Ավետարանիչ եկեղեցու ուխտի օրն էր:
 

Եկեղեցական կյանք 28.05.2018


Մայիսի 28-ի առավոտյան Ամենայն հայոց կաթողիկոսի նախագահությամբ Մայր Աթոռի Ս. Տրդատի բաց խորանում Մայիսյան հերոսամարտերի և Առաջին հանարպետության 100-ամյակի առթիվ գոհաբանական մաղթանք կատարվեց: Հայոց հոգևոր առաջնորդը ծնկաչոք և գլխաբաց աղոթեց՝ Տիրոջ բարերարությունը խնդրելով Հայաստանի համար:
Մայիսի 28-ին Սարդարապատի հուշահամալիրում տեղի ունեցավ «Հաղթանակի դար» միջոցառումը: Վարչապետ Նիկոլ Փաշինյանը, նախագահ Արմեն Սարգսյանը, Արցախի նախագահ Բակո Սահակյանն ու Ամենայն հայոց կաթողիկոս Գարեգին Երկրորդը ծաղկեպսակներ դրեցին Սարդարապատի հուշահամալիրում, որից հետո Վեհափառը աղոթք հնչեցրեց: Զինվորական շքերթից ու տոնական համերգից հետո, հանդիսության ավարտին Նորին սրբությունը ողջունեց հավատացյալներին՝ տալով իր օրհնությունը: 
Այս տարի մայիսի 28-ին Հայ առաքելական եկեղեցին նշեց Հռիփսիմյանց կույսերի տոնը: Մայր Աթոռից սուրբ Հռիփսիմեի վանք  տարվեց սրբուհու մասունքը: Այս տարի սուրբ Հռիփսիմեի անունը կրող եկեղեցին նշում է նաև  կառուցման 1400-ամյակը:
Այս օրերին մեր երկիր բազմաթիվ օտարերկրյա քաղաքացիներ, նաև սփյուռքահայեր են ժամանել՝ Հայաստանի առաջին հանրապետության 100-մյակի և Սարդարապատի հերոսամարտերի տոնակատարություններին մասնակցելու նպատակով: Գարգեին Բ Ամենայն հայոց հայրապետը նախ ընդունեց ԱՄՆ Օքլենդ քաղաքի Սուրբ Վարդան եկեղեցու հոգևոր հովիվ Տ. Հովել քահանա Օհանյանի առաջնորդած խմբին: Ուխտավորներից շատերն առաջին անգամ էին հայրենիքում: Այնուհետ Վեհափառ հայրապետն ընդունեց Տ. Մաղաքիա վարդապետ Ամիրյանի ուղեկցությամբ հայրենիք եկած արգենտինահայ ուխտավորներին: 
Մայիսի 25-ին Մայր Աթոռ Ս. Էջմիածնում Ամենայն հայոց կաթողիկոսն ընդունեց մշակույթի նախարար Լիլիթ Մակունցին: Շնորհավորելով նախարարին նշանակման կապակցությամբ՝ Վեհափառ հայրապետը նրան մաղթեց արդյունավետ ծառայություն՝ ի նպաստ հայրենիքի և հայ ժողովրդի մշակութային կյանքի զարգացման:
Մայր Աթոռի հրատարկչությունը մայիսյան հերոսամարտերի և Առաջին հանրապետության 100-ամյակի առիթով լույս է ընծայել «Զինվորյալ հոգևորականներ» և «Զորավոր սրբեր» գրքերը: Երկու աշխատությունների հեղինակն էլ Մատենադարանի գիտաշխատող  Լուսինե Թումանյանն է:
Մայիսի 22ին, Կալիֆորնիայի Նյուհոլ քաղաքի Իթերնըլ Վէլլի հուշահամալիրի տարածքում տեղի ունեցավ Սարդարապատի ճակատամարտին նվիրված հուշարձանի կրկնօրինակի բացման և օրհնության հանդիսավոր արարողություն: 
Հեռավոր 1974 թվականին ընթերցողի սեղանին դրվեց Սարդարապատի հերոսամարտի մասին պատմող առաջին՝ Ռոբերտ Կարայանի «Արևը գեղեցիկ է մայրամուտին» գիրքը: Վեպը կրճատումների էր ենթարկվել, սակայն գրեթե տասը տարի անց հեղինակը կարողանում է այն տպել ամբողջությամբ` այս անգամ «Փրկություն» վերնագրով: Մայիսյան հերոսամարտերի հոբելյանական օրերը ամենահարմար առիթն են՝ գրողի խիզախումը վերարժևորելու համար:
 

Եկեղեցական կյանք 25.05.2018


Մայիսի 25-ին ՀՀ նախագահի նստավայրում տեղի է ունեցել «Հայաստան» համահայկական հիմնադրամի հոգաբարձուների խորհրդի և տեղական մարմինների 27-րդ համատեղ նիստը, որը վարել է ՀՀ նախագահ, հոգաբարձուների խորհրդի նախագահ Արմեն Սարգսյանը: Նիստին մասնակցել են Ամենայն հայոց կաթողիկոս Գարեգին Երկրորդը, ՀՀ վարչապետ Նիկոլ Փաշինյանը, Արցախի Հանրապետության նախագահ Բակո Սահակյանը, պաշտոնատար այլ անձինք:
Մայիսի 24-ին հանդիպել են Ամենայն հայոց կաթողիկոսն ու Հայաստանի Հանրապետության վարչապետը: Նիկոլ Փաշինյանը շնորհակալություն հայտնելով Գարեգին Երկրորդ Վեհափառ հայրապետին, գոհունակությամբ նշել է, որ Նորին սրբության և Հայ եկեղեցու խաղաղության ու հանդուրժողականության ուղերձները օգնել են, որ վերջին շրջանի ներքաղաքական լարվածությունը խաղաղ հանգուցալուծում ստանա:
Մայիսի 24-ին Մայր Աթոռ Սուրբ Էջմիածնում քահանաների հերթական հավաքն էր: Իրենց թեմակալ առաջնորդների հետ Էջմիածին էին ժամանել շուրջ 200 քահաններ: Մինչ ժողովի սկիզբը, Հայոց հայրապետի գլխավորթյամբ եկեղեցականները Մայր Տաճարում նախ ժամերգության մասնակցեցին, ապա խմբվեցին Գևորգ 5-րդ Սուրենյաց կաթողիկոսի շիրիմի առջև, կատարվեց հոգեհանգստյան կարգ:
Մայիսի 18-ից 20-ը կայացել է Կանադահայոց թեմի պատգամավորական տարեկան ժողովը, որին մասնակցել են երկրի հայկական ծխերի ներկայացուցիչները: Թեմական պատգամավորները նշել են նաև հյուրընկալի` սուրբ Վարդան եկեղեցու ծխի հիմնադրման 50-ամյակը: Այս պատմական առիթով Եղիսաբեթ Բ թագուհին հռչակագիր է հղել հայոց թեմին, որում մայիսի 20-ը հռչակել է Հայկական ժառանգության օր: Կանադայի կառավարության անունից երկրի վարչապետ Ջասթին Թրյուդոն հատուկ ուղերձով ողջունել է ժողովի մասնակիցներին և հաջողություն մաղթել:
Օրերս ԱՄՆ «Հայրենիք միություն» բարեգործական հիմնադրամի միջոցներով և «Ձեռք մեկնիր եղբորդ» ծրագրով Վանաձորում գնվեց հերթական բնակարանը: 21-րդ բնակարանի սեփականատեր դարձավ Արա Շեկոյանի բազմանդամ ընտանիքը:
Հայաստանի և Արցախի դպրոցներում այսօր՝ մայիսի 25-ին հնչեց վերջին զանգը: Արաբկիր համայնքի թիվ 82 և թիվ 128 դպրոցների շրջանավարտների օրը մեկնարկեց նորակառույց եկեղեցու բակից: Վերջին դասից առաջ եկել էին օրհնություն ստանալու, աղոթելու իրենց նպատակների ու երազանքների իրագործման համար:
Ուսումնական տարին ավարտվում է Մայր Աթոռի հովանավորությամբ գործող բոլոր հայորդյաց տներում: Ամենուր հաշվետու բաց դասեր են, համերգներ և ցուցահանդեսներ: Նորքի հայորդյաց տան «Հայկազունք» ազգագրական երգի-պարի համույթի սաները հուզմունքով են պատրաստվել տարեվերջյան ստուգատեսին:
Մշակույթի նախարարությունում ստորագրվեց Կոտայքի մարզի Կարենիս գյուղի Սրբոց Առաքելոց եկեղեցական համալիրի ամրակայման, վերականգնման և տարածքի բարեկարգման` պետության և մասնավոր կառույցների համատեղ աշխատանքների մասին հուշագիր։ Փաստաթուղթը ստորագրեցին ՀՀ մշակույթի նախարարի տեղակալ Արև Սամուելյանը և Կոտայքի մարզի Կարենիս համայնքի վարչական ղեկավար Արմեն Բաղդասարյանը:
 

Եկեղեցական կյանք 21.05.2018


Հոգեգալուստը` Պենտեկոստեն, առաքյալների վրա Ս. Հոգու իջման հիշատակությունն է, որը տեղի է ունեցել Ս. Հարության 50-րդ օրը: Այս տարի Հայ առաքելական եկեղեցին տոնը նշեց մայիսի 20-ին: 
«Թանգարանների գիշեր» միջոցառման շրջանակում Մայր Աթոռի «Ռուբեն Սևակ» թանգարանում բացի մշտական ցուցադրությունից և մայիսյան հերոսամարտին վերաբերող նյութերից, ցուցադրվեց նաև Միքայել Հարությունյանի նոր՝ «Վերջ Գողգոթային, հաղթություն» կտավը, որի թեման Սարդարապատի հերոսամարտում Գևորգ 5-րդ Սուրենյանց կաթողիկոսի դերակատարությունն է: 
«Թանգարանային գիշեր» ծրագրի շրջանակում Գևորգյան ճեմարանի «Էջմիածին» երգչախումբը համերգային ծրագրով ելույթ ունեցավ Ազգային պատկերասրահում: 
Մայիսի 19-ին Մալաթիայի հայորդյաց տունը տոնական միջոցառում էր նախաձեռնել՝ նվիրված Հայաստանի առաջին հանրապետության հռչակման և մայիսյան հերոսամարտերի 100-ամյակին: 
Մայր Աթոռի հրատարակչատունը Գևորգ Տեր-Վարդանյանի աշխատասիրությամբ լույս է ընծայել Վահան ծայրագույն վարդապետ Բաստամյանցի «Տարեգրությունը»: Վարդապետի հուշագրությունը պատմում է 1872-1880 թվականների Ս. Էջմիածնի մասին:  
 

Եկեղեցական կյանք 18.05.2018


Մայիսյան հերոսամարտերի և Հայաստանի Առաջին Հանրապետության հռչակման 100-ամյակին նվիված  տոնակատարությունների շրջանակում  մայիսի 22-ին Ս. Էջմիածնի  «Վաչե և Թամար Մանուկյան» մատենադարանում կբացվի թեմատիկ ցուցադրություն՝ «Անկախությունից դեպի անկախություն» խորագրով: Նույն օրը  Սփյուռքի նախարարության հետ համատեղ կանցկացվի «Հայաստանի  Հանրապետությունը և հայ եկեղեցու դերակատարությունը հայոց պետականության կայացման գործում» խորագրով գիտաժողով:  
«Համազգային հայ կրթական մշակութային միությունը» Մատենադարանին նվիրաբերել է 14-20-րդ դարերի 27 արժեքավոր ձեռագիր: 
Մայսի 17-ին ԳԱԱ Արևելագիտության ինստիտուտի նախաձեռնությամբ մեկնարկեց «Հայաստանը և արևելաքրիստոնեական քաղաքակրթությունը» թեմայով արդեն երրորդ հանրապետական գիտաժողովը: Այս տարի այն նվիրվեց լուսահոգի պատմաբան, պրոֆեսոր Պավել Չոբանյանի ծննդյան 70-ամյակին: Գիտաժողովին ներկայացվելիք շուրջ 40 զեկուցումների հեղինակները Հայաստանի, Վրաստանի, Ռուսաստանի, Հունաստանի ակադեմիական և բուհական հաստատությունների գիտնականներ են: 
Վրաստանում տեղի է ունեցել տոլմայի ամենամյա փառատոնը: Սա Վիրահայոց թեմի և «Հայարտուն» կենտրոնի աջակցությամբ անցկացվող ամենաժողովրդական միջոցառումներից է: 
Միջազգային լուրեր- Պակիստանի խորհրդարանը որոշել է ճանաչել մարդկանց երրորդ սեռը: Միացյալ Նահանգներում Հիմալայների բուդդիստական արվեստին նվիրված ցուցահանդես է ընթանում: Բրիտանիայում քրիստոնյաներին կթույլատրվի պարանոցի խաչ կրել աշխատավայրում: 
 

Եկեղեցական կյանք 14.05.2018


Մայիսի 8-ը Երկրապահի օրն է: Այդ օրը մատուցվում է պատարագ և հարգանքի տուրք է մատուցվում հերոսներին, որոնք իրենց կյանքը նվիրեցին հայրենիքի փրկությանը: Այս տարի, Ամենայն հայոց կաթողիկոսի հանդիսապետությամբ, մայիսի 12-ին Մայր Տաճարում կատարվեց Հանրապետական մաղթանքի արարողություն: 
Արդեն 6-րդ տարին է, մայիսի 14-ին Երևանի մաշտոցյան մատենադարանից դուրս է բերվում Զորավոր անունը կրող Ավետարանն ու Երևանի Սուրբ Զորավոր Աստվածածին եկեղեցի տարվում: 
Քրիստոսի Համբարձման տոնին հաջորդող կիրակի օրը մեր եկեղեցին նշում է 7-րդ կիրակին կամ ժողովրդի խոսքով՝ Երկրորդ Ծաղկազարդը: Տավուշի թեմի առաջնորդ Բագրատ եպիսկոպոս Գալստանյանի հանդիսապետությամբ Երկրորդ Ծաղկազարդի օրը պատարագ մատուցվեց սահմանապահ Ոսկեպարի Սուրբ Մարիամ Աստվածածին եկեղեցում: Օրեր առաջ սրբազանը կատարել էր նաև Գետահովիտ համայնքում կառուցվող եկեղեցու հիմնարկեքի արարողությունը: 
Կանադայի հայոց թեմի ներկայացուցիչները մասնակցել են քրիստոնեական երիտասարդական գագաթնաժողովին: Ամենամյա միջոցառումն անցկացվում է Կանադայի սենատի նախագահողի հովանավորությամբ: Հանդիպմանը ներկա էր նաև երկրի վարչապետը:
ՀՕՖ-ի՝ Երեխաների աջակցության կենտրոնում երեխաներն իրենց պատրաստած տիկնիկներով ներկայացում էին բեմադրել: «Ձեռքերով թատորն»-ը Հայաստանի Աստվածաշնչային ընկերության «Առաքելություն մանուկների» ծրագրի մաս է: 
Միջազգային լուրեր- Մոսկվայում բարեկարգման աշխատանքների ժամանակ 15-րդ դարի Զլատոուստյան մենաստանի ցանկապատի մի հատված են գտել: Ամերիկացի գրող և լուսանկարիչ Թոմաս Լեյրդը տասը տարի անցկացրել է Տիբեթում` լուսանկարելով և վավերացնելով բուդդայական վանքերի փշրվող ու թափվող որմնանկարները:                          Բելգիական Գրիմբերգեն մենաստանի վանականները ցանկանում են վերականգնել գարեջրագործության հնագույն ավանդույթները: Իտալական Բարի քաղաքում ռուսական սրբապատկերների ցուցադրություն է բացվել: 
 

Եկեղեցական կյանք 11.05.2018


Մայիսի 10-ին Հայ առաքելական եկեղեցին տոնեց Տիրոջ հրաշափառ Համբարձումը: Նույն օրը մեր եկեղեցին նշում է նաև Հայրապետական աթոռը Սսից Էջմիածին տեղափոխելու տոնը:
Համբարձման տոնը՝ Արաբկիրի նորակառույց եկեղեցում: 
Գևորգյան հոգևոր ճեմարանի ընթերցարանի գմբեթի որմնանակարը մասնակի վերանորգման կենթարկվի: Որմնանկարը հայկական գյուղաշխարհ է պատկերում, իսկ կենտրոնում Կոմիտաս վարդապետն է՝ ճամփեզրի քարին նստած:
Մայիսի 11-ին Գևորգյան հոգևոր ճեմարանում տեղի է ունեցել գիտաժողով՝ նվիրված Մաղաքիա արքեպիսկոպոս Օրմանյանի մահվան 100-ամյա տարելիցին:  
Միջազգային լուրեր. Մոսկվայի կենտրոնում, ճանապարհների բարեկարգման աշխատանքների ժամանակ, մոտավորապես 15 կամ 16 դար թվագրվող մասնատուփի փեղկ են հայտնաբերել: Սիրիայի հյուսիսում վաղ միջնադարյան ստորգետնյա տաճար է հայտնաբերվել: Նյու Յորքում սիկհերը ազգային հագուստով երթ են կազմակերպել: Անգլիկան եկեղեցին փորձում է խաղաղեցնել մեծ աղմուկ բարձրացրած Լանկաշիրյան պատմությունը: Մալթայի օրդենը նոր մեծ մագիստրոս ունի՝ իտալացի արիստոկրատ, արվեստաբան և հնագետ Ջակոմո Դալլա Տորեն: 
 

Եկեղեցական կյանք 08.05.2018


Ամենայն հայոց կաթողիկոսը շնորհավորել է նորընտիր վարչապետ Նիկոլ Փաշինյանին: