Մայր Աթոռ Սուրբ Էջմիածնում յոթ ուխտյալների քահանայական ձեռնադրություն է կատարվել


Շաբաթ երեկոյան ժամերգության ավարտից հետո տեղի է ունեցել քահանայական կոչման ընծայում: Մայրավանքում, սուրբ Էջմիածնի միաբանների ներկայությամբ կատարվել է նորընծաների ուղղափառ հավատքի հրապարակային քննություն: Ընծայացուները միաբերան մերժել և նզովել են հերետիկոսներին ու հերձվածողներին, ուխտել են հետևել սուրբ առաքյալների, հայոց հայրապետների և վարդապետների հավատքին և ուսմունքին: Կիրակնօրյա պատարագի ընթացքում Ամենայն Հայոց Կաթողիկոսի օրհնությամբ Մայր Տաճարում կատարվել է յոթ ուխտյալների քահանայական ձեռնադրությունը:

 

Պոլսի հայոց պատրիարքարանը հրատարակել է Լևոն Լաճիկյանի «Պոլիսը՝ հին և նոր» պատկերագիրքը


Հայաստանում Հայերեն, անգլերեն, թուրքերեն եռալեզու պատկերագիրքը ներկայացրել են գրադարանային շաբաթվա սկզբին, ԳԱ հիմնարար գիտական գրադարանում: Նկարիչը պատկերել է Պոլսի քաղաքային միջավայրն ու մշակույթը, որտեղ համերաշխորեն ապրում են հինն ու նորը, արևելքն ու արևմուտքը՝ կենսունակ ու ինքնատիպ հակադրություններով: Լևոն Լաճիկյանը պատկերել է նաեւ քաղաքի մի քանի տասնյակ եկեղեցիները, որոնք գրեթե տեսանելի չեն, թաքնված են բարձր պարիսպների և դարպասների հետևում:

 

Նորոգումից ու բարեկարգումից հետո Պոլսում վերաբացվել է Թաքսիմի Ս. Հարություն եկեղեցին


Վերաբացման և վերաօծման արարողությանը Սահակ պատրիարքի գլխավորությամբ հոգեւորականները եկեղեցու մուտքի առջև կատարել են դռնբացեքի կարգ: Նավակատիքի աղոթքներից հետո Սահակ սրբազանը սրբալույս մյուռոնով օծել է եկեղեցու ավագ սեղանը: Մկրտության ավազանը, բեմը և Սուրբ Աստվածածնի մատուռի սեղանը օծել է Արամ արքեպիսկոպոս Աթեշյանը: Եկեղեցին հիմնադրվել է 19-րդ դարի սկզբին՝ Էսայան դպրոցի այգում:

 

Ամենայն Հայոց Կաթողիկոսը Մայր Աթոռում հյուրընկալել է Վրաստանի նախագահին


Վեհափառ Հայրապետն իր գնահատանքն է հայտնել տասնհինգ հայ գերիներին վերադարձնելու ջանքերի և Վրաստանի հայ համայնքի նկատմամբ հոգածու վերաբերմունքի համար։ Վրաստանի նախագահը հավաստիացրել է, որ իրենք կնպաստեն տարածաշրջանում խաղաղության ու կայունության հաստատմանը և գերիների ազատ արձակմանը։ Միխեիլ Կավելաշվիլին Նաթան արքեպիսկոպոս Հովհաննիսյանի ուղեկցությամբ այցելել է Մայր Տաճար և շրջել Մայր Աթոռի տարածքում։

 

Պատմության թանգարանում ցուցադրվում է Մարսելում ապաստանած հայ գաղթականների իրերը


Ցուցադրության նմուշները երկու տարբեր հավաքածուներից են: Մի հատվածում «ARAM» միության հավաքագրած նյութերն են Մարսելի Քեմփ Օտտո նախկին զինվորական ճամբարում հայ գաղթականների մասին։ Մյուսում պատմության թանգարանի հավաքածուի նմուշներն են, որոնք պատմում են այն վայրերի մասին, որտեղից հայ գաղթականները հասել են Ֆրանսիա: Գաղթականների մեծ մասը Սեբաստիայից են, նաև Կոնիայից, Յողզաթից, Այնթափից, Վանից, Խարբերդից ու Թոքատից: 1915-ին տեղահանված գաղթականները երկար ժամանակ թափառել են անապատներում, իրենց ծննդավայրերից փորձել են հեռու չգնալ՝ չկորցնելով տուն դառնալու հույսը: 1922-ին Իզմիրի անկումը վերջնականպես խորտակել է վերադառնալու հույսերը: Դրանով է պայմանավորված, որ նրանք Մարսել են հասել ոչ թե 1915-ին, այլ 1922-ին:

 

Ամենայն Հայոց Կաթողիկոսը մասնակցել է Ֆրանցիսկոս Պապի հուղարկավորությանը


Հուղարկավորության արարողությանը մատուցվել է Սուրբ Պատարագ, որի ընթացքում տարբեր Եկեղեցիների ներկայացուցիչներ առիթ են ունեցել աղոթելու Ֆրանցիսկոս Պապի հոգու խաղաղության համար։ Նախորդ օրը Սուրբ Պետրոսի տաճարում Ամենայն Հայոց Հայրապետը մասնավոր աղոթք էր բարձրացրել Ֆրանցիսկոս Պապի հոգու հանգստության համար։ Սուրբ Պետրոսի տաճար պոնտիֆիկոսին հրաժեշտ տալու շուրջ 250 հազար ուխտավոր է այցելել։

 

Ցեղասպանության տարելիցի իրադարաձությունների քրոնիկոնը՝


Թբիլիսիում վիրահայերը պահանջատիրական ցույց են իրականացրել Թուրքիայի դեսպանատան դիմաց
Լոնդոնի սուրբ Եղիշե հայ առաքելական եկեղեցում ոգեկոչվել է Հայոց ցեղասպանության 110-րդ տարելիցը
Սուրբ նահատակների հիշատակը ոգեկոչվել է նաև Օքսֆորդի համալսարանական եկեղեցում։
Դամասկոսի քույր եկեղեցիների առաջնորդների ու եպիսկոպոսների մասնակցությամբ տեղի է ունեցել միջեկեղեցական բարեխոսական աղոքթ

Ամենայն Հայոց Կաթողիկոսը կմասնակցի Հռոմի Ֆրանցիսկոս պապի թաղման արարողությանը


Քահանայապետի մահվան կապակցությամբ Գարեգին Բ ամենայն հայոց կաթողիկոսը ցավակցագիր է հղել: Վեհափառ հայրապետն ընդգծել է, որ հայ ժողովուրդը երախտագիտությամբ է հիշում Հայոց ցեղասպանության 100-րդ տարելիցի առթիվ Սուրբ Պետրոս տաճարում մատուցված պատարագը, Սուրբ Գրիգոր Նարեկացուն տիեզերական վարդապետ հռչակելը, ինչպես նաև պապի՝ Հայաստան այցելությունը:

 

Նյումեգ հրատարակչությունն ու ՀԲԸՄ կազմակերպել են ցեղասպանագիտության շաբաթ


Միջոցառմանը հեղինակի մասնակցությամբ քննարկել են թուրք պատմաբան Թաներ Աքչամի «Ցեղասպան պետության ակունքները» կամ «Հարյուր տարվա ապարտեիդ» գիրքը, որտեղ Աքչամը քննադատում է Թուրքիայի հարյուր տարվա պատմությունը, ընդգծում կառուցվածքային խնդիրներն ու ժողովրդավարական արժեքների բացակայությունը։ Նա նկատում է, որ երկրի հիմնադրման պատմությունը խեղաթյուրված է և ծառայում է ռեժիմին։ Աքչամի կարծիքով, Թուրքիայի պետական կառուցվածքը հիմնված է խտրականության, բռնության և ճնշումների վրա, ինչը հիշեցնում է «ապարտեիդի» համակարգի գործելաոճը։ Թուրք պատմաբանը առաջարկում է պատմությունը վերաշարադրել նոր տեսանկյունից, առանց քարոզչության և կոչ է անում ընդունել անցյալի սխալները, որպեսզի Թուրքիան կարողանա կառուցել ավելի ազատ և արդար հասարակություն։

 

Հռոմի երջանկահիշատակ Ֆրանցիսկոս Պապը 9 տարի առաջ այս օրերին Հայաստանում էր


Նա Հայաստան էր եկել Գարեգին Բ ամենայն հայոց Կաթողիկոսի հրավերով և մի քանի օր անցկացրել է սուրբ Էջմիածնում, այցելել է սրբավայրեր, աղոթել՝ հայոց եկեղեցիներում: Ֆրանցիսկոս քահանայապետը պապ էր ընտրվել 2013 թվականին Բենեդիկտոս 16-րդ պապի հրաժարականից հետո: Կաթոլիկ աշխարհի հովվապետը 89 տարեկանում մահացել է Վատիկանում գտնվող իր կեցավայրում:

 

Դեպի Հարության Տաճար ուղեւորվելիս հայ հոգեւորականներն ու ուխտավորները կրել են Արցախի դրոշը


Ապրիլի 20-ի կեսգիշերից հետո Երուսաղեմի հայոց վանքի միաբանները կատարել են առաջին մուտքը Սուրբ Հարության Տաճար: Քրիստոսի խաչելության վայրում՝ Սուրբ Գողգոթայի վրա, աղոթքից հետո Միաբանությունը բարձրացել է Հայոց Երկրորդ Գողգոթա վերնամատուռ, որտեղ կատարվել է Գիշերային ժամերգություն: Լուսադեմին առավոտյան ժամերգության շարականի երգեցողությամբ Միաբան Հայրերը եւ Ժառանգավոր սաները թափորով վերնամատուռից իջել են և սկսել եռադարձ թափորը Քրիստոսի Ս. Գերեզմանի շուրջ: Առավոտյան տեղի է ունեցել երկրորդ մուտքը Սուրբ Հարության Տաճար։

 

Սուրբ Հարության տոնը Թբիլիսիի հայերը նշել են թեմի առաջնորդանիստ Սուրբ Գեւորգ եկեղեցում


Հիսուս Քրիստոսի հրաշափառ Հարության տոնի առիթով Թբիլիսիի Սուրբ Գևորգ առաջնորդանիստ եկեղեցում Սուրբ և Անմահ Պատարագ է մատուցել Վիրահայոց թեմի առաջնորդ Կիրակոս եպիսկոպոս Դավթյանը: Նա օրհնել է զատկական խորհրդանիշ ներկված հավկիթները: Պահպանիչ աղոթքից հետո սկսվել է ժողովրդական տոնախմբություն: Հյուրասիրություն է կազմակերպվել եկեղեցու բակում: