Բրազիլիայի հայերը միացել են Ադրբեջանում ապօրինի պահվող Հայ գերիների համար միասնական աղոթքին


Սան Պաուլուի Սուրբ Գևորգ առաջնորդանիստ եկեղեցում բրազիլահայերն աղոթել են արցախահայերի իրավունքների պաշտպանության, մասնավորապես՝ Ադրբեջանի կողմից առևանգված, գերեվարված եւ Բաքվում շինծու մեղադրանքներով ապօրինաբար պահվող զինծառայողների, քաղաքացիական անձանց և Արցախի Հանրապետության ռազմաքաղաքական ղեկավարության ներկայացուցիչների համար։ Թեմակալ առաջնորդն ընդգծել է, որ հայաթափվել է Արցախը, զինաթափվել է պաշտպանության բանակը, պղծվել են հայկական տաճարներն ու սրբատեղիները, գերի են տարվել բազմաթիվ զինվորականներ, քաղաքացիական անձինք:

 

Եկեղեցիների համաշխարհային խորհուրդը հանդես է եկել արցախցիների բռնի տեղահանման վերաբերյալ հայտարարությամբ


Ժնևում՝ Եկեղեցիների համաշխարհային խորհրդի կենտրոնակայանում, Ամենայն Հայոց Կաթողիկոսի կոչով կայացել է միասնական աղոթք: Արարողությունն անցկացվել է Ժնևի սուրբ Պիեռ տաճարում և սկսվել է հայերեն տերունական աղոթքով: Եկեղեցիների համաշխարհային խորհուրդը բարի կամքի տեր մարդկանց հրավիրել է միանալ Հայաստանի համար աղոթքին` հանուն խաղաղության, գերիների ազատ արձակման և բռնի տեղահանվածների աջակցության: Խորհուրդը հանդես է եկել հայտարարությամբ` հիշեցնելով 2020 թվականի պատերազմը Արցախի դեմ, տասը ամիս տևած շրջափակումը և շուրջ 120 հազար մարդու բռնի տեղահանումը:

 

Կոմիտասի 155-ամյակին նվիրված համերգ է կազմակերպվել Պոլսի Սուրբ Երրորդություն Եկեղեցում


Համերգը նախաձեռնել է Բալաթի Սուրբ Հրեշտակապետաց եկեղեցու թաղային խորհուրդը: Ելույթ է ունեցել Պոլսի Լուսավորիչ դպրաց դաս երգչախումբը` Հակոբ Մամիկոնյանի ղեկավարությամբ: Հանդիսությունը նախագահել է Սահակ Բ պատրիարքը` պատրիարքարանի հոգևոր դասի մասնակցությամբ: Երգչախումբը ներկայացրել է կոմիտասյան բազմաձայն երգեր: Կոմիտասի ազգական Թամար Էսքենյանը սրինգ, շվի և դուդուկ է նվագել, նաև երգել է։

 

Հայաստանի եւ սփյուռքի թեմերի բոլոր եկեղեցիիներում համընդհանուր աղոթք կհնչի գերիների համար


Գարեգին Երկրորդ Ամենայն Հայոց Կաթողիկոսի տնօրինությամբ Մայր Աթոռ Սուրբ Էջմիածնում, Հայաստանի և սփյուռքի թեմերի բոլոր եկեղեցիներում նոյեմբերի 10-ին Սուրբ Պատարագի ընթացքում կկատարվի համահայկական աղոթք: Հայոց հայրապետի կոչով աղոթք կհնչի արցախահայերի իրավունքների պաշտպանության, մասնավորապես Ադրբեջանի կողմից առևանգված, գերեվարված և Բաքվում շինծու մեղադրանքներով ապօրինաբար պահվող զինծառայողների, քաղաքացիական անձանց և Արցախի Հանրապետության ռազմաքաղաքական ղեկավարության ներկայացուցիչների համար։

ԳՀԽ անդամները մտահոգություն են հայտնել Հայաստանի անվտանգության ու ներքաղաքական խնդիրների կապակցությամբ


Մայր Աթոռ Սուրբ Էջմիածնում, Գարեգին Երկրորդ Ամենայն Հայոց Կաթողիկոսի նախագահությամբ և Կ. Պոլսի Հայոց Պատրիարք Սահակ արքեպիսկոպոս Մաշալյանի ատենապետությամբ տեղի է ունեցել Գերագույն հոգևոր խորհրդի ժողովը, որի անդամները մտահոգությունն արտահայտեցին Հայաստանի անվտանգային և ներքաղաքական խնդիրների կապակցությամբ՝ կարևորելով ազգային միասնության և համախմբման անհրաժեշտությունը՝ ի նպաստ հայրենիքի զորացման և ինքնիշխանության պահպանման։ Նրանք հաստանել են, որ Ադրբեջանում ապօրինի պահվող գերիների վերադարձի, Արցախի հոգևոր-մշակութային ժառանգության պահպանման, արցախահայերի իրավունքների պաշտպանության, Ադրբեջանի ցեղասպան գործողությունների դատապարտման խնդիրները պետք է բաց պահել միջազգային օրակարգում։

 

Մայր տաճարի վերաօծումից հետո կայացել է առաջին եպիսկոպոսական ձեռնադրությունն ու օծումը


Ամենայն հայոց Կաթողիկոսը եկեղեցական թափորով առաջնորդվել է Մայր տաճար` մատուցելու Սուրբ Պատարագ և կատարելու եպիսկոպոսական ձեռնադրություն: Հայրապետական ամպհովանին կրել են եկեղեցու չորս բարերարներ: Ամպհովանու տակ Նորին սրբությանն ուղեկցել են առընթերականները` Պոլսի հայոց պատրիարքը և Նաթան արքեպիսկոպոս Հովհաննիսյանը: Հայոց հովվապետը աղոթքով և օրհնությամբ նորընծաներին շնորհել է եպիսկոպոսական կոչման յոթ աստիճանները, պատգամել ու հանձնարարել խնամել Քրիստոսի հոտը` հավատարիմ մնալով եկեղեցու հայրերի և սրբերի ավանդներին: Այստեղ վեց եպիսկոպոսացուներին հանձնվել է եպիսկոպոսական հանդերձի մաս հանդիսացող եմիփորոնը:

 

Վեհափառ Հայրապետը ընդունել է Հունաստանի եւ Կրետեի ուխտավորներին


Գարեգին Բ ամենայն Հայոց Կաթողիկոսն ընդունել է Հունաստանի և Կրետեի հայ համայնքներից եկած ուխտավորների: Նրանք Սուրբ Էջմիածին են ժամանել Վեհափառ Հայրապետի օրհնությունը ստանալու և իրենց հոգեւոր առաջնորդի կողքին լինել եպիսկոպոս ձեռնադրվելու ժամանակ։ Շուրջ տասը տարի Հունաստանում ծառայած հայր Խորենը կձեռնադրվի եպիսկոպոս: Նրանց հետ հանդիպմանը Նորին Սրբությունը ընդգծել է, որ եպիսկոպոսական ձեռնադրությունը նշանակալի երևույթ է եկեղեցու կյանքում: Հայոց հայրապետը պատգամել է, որ աջակցեն իրենց առաջնորդին, քանի որ այդ կերպ կաջակցեն նաև եկեղեցուն, Հայաստանին, պետությանն ու ժողովրդին:

 

Կանադայի հայոց թեմը տոնել է հիմնադրման 40-ամյակը


Կանադահայոց թեմի հիմնադրման 40-ամյակին նվիրված պաշտոնական միջոցառմանը Աբգար սրբազանը 40-ամյակի հուշամեդալով է պարգևատրել թեմական խորհրդի ատենապետերին, անդամներին, հոգևորականներին և շուրջ չորս տասնամյակ ի նպաստ առաջնորդարանի ծառայած անձանց։ ԵՊՀ աստվածաբանական ֆակուլտետի դեկան Անուշավան եպիսկոպոս Ժամկոչյանը պատարագ է մատուցել Մոնրեալի Սուրբ Գրիգոր Լուսավորիչ եկեղեցում, որտեղ թեմակալ առաջնորդի և հոգևոր հայրերի հետ նաև ջրօրհնեքի կարգ է կատարել նոր մյուռոնով:

 

Գեւորգյան հոգեւոր ճեմարանի սաները ազգային ինքնության, նեոխարիզմատիկ շարժումների մասին թեզեր են պաշտպանել


Ճեմարանականներ պաշտպանել են մագիստրոսական թեզ եկեղեցու և ազգային ինքնության, նեոխարիզմատիկ շարժումների, Հայաստանում մոլոկանների համայնքի մասին, որոնք ղեկավարել է Գևորգյան հոգևոր ճեմարանում ժամանակակից աղանդագիտություն դասավանդող Ղևոնդ ավագ քահանա Մայիլյանը։ Վեհափառ հայրապետի հաստատումից հետո ճեմարանականները մագիստրոսական աստիճան և դիպլոմներ կստանան:

 

Մաշտոցյան Մատենադարանում բացվել է Միջնադարյան Հայաստանի վերաբերյալ նոր ցուցասրահ


Մաշտոցյան Մատենադարանում նոր ցուցասրահ է բացվել, որտեղ ներկայացված են Միջնադարյան Հայաստանի այն հմտությունները, արվեստն ու արհեստը, որոնց շնորհիվ ծնվում էին հոգևոր, գիտական, եկեղեցական նշանակության ձեռագրերը: Ցուցասրահը միջնադարյան լաբորատորիան է ներկայացնում, թե ինչպես են ձեռագիր պատրաստել, գրել և նկարազարդել գործիքները, պարագաները և ներկանյութերը։

 

Վեհարանում տեղի է ունեցել Ամենայն Հայոց Կաթողիկոսի և Պոլսո Հայոց Պատրիարքի առանձնազրույցը


Մայր Աթոռի միաբանները Կ․ Պոլսի Հայոց Պատրիարքին թափորով առաջնորդել են Մայր Տաճար, որտեղ Իջման Սուրբ Սեղանի առջև կատարվել է «Հրաշափառի» արարողություն։ Տաճարի վերաօծումից ու վերաբացումից հետո առաջին անգամ է իրականացվել այս արարողությունը։ Ավելի ուշ Վեհարանում տեղի է ունեցել Գարեգին Երկրորդ Ամենայն Հայոց Կաթողիկոսի և Պոլսո Հայոց Պատրիարքի առանձնազրույցը: Առաջիկա օրերին Սահակ Պատրիարքը կմասնակցի Մայր Աթոռում գումարվելիք Գերագույն հոգևոր խորհրդի ժողովին:

 

Իրադարձային շաբաթը մեկ շնչով՝


Խաժակ Արքեպիսկոպոս Պարսամյանը օրհնել եւ օծել է Նիդերլանդների Նյուվեխայն քաղաքի Սբ. Նիկողայոս եկեղեցու բակի խաչքարերը։ Եղեգնաձորի երկրագիտական թանգարանում կայացել է Գլաձորի համալսարանի 740 ամյակին նվիրված միջոցառում ԱՄՆ հայոց Արևմտյան թեմի երիտասարդները մեկնել են Ճապոնիա` մասնակցելու «Kakehashi» ծրագրին: