Մայր Տաճարում Ծաղկազարդի երեկոյան Դռնբացեքի կարգ է կատարվել


Դռնբացեքի կարգը խորհրդանշում է Քրիստոսի Երկրորդ Գալուստը, երբ արդարների համար պիտի բացվեն երկնային արքայության դռները: Այն ընթանում է վարագուրված՝ Մայր Խորանից ներս և դրանից դուրս գտնվող հոգևորականների միջև երկխոսության ձևով: Հոգևորականները ծնկաչոք խնդրում են Տիրոջը բացել ողորմության դուռը, որպեսզի արդարները մուտք գործեն այնտեղ:

 

Հովանավանքում ուխտավորներն ու հոգեւորականները մասնակցել են ժամերգության


Արագածոտնի թեմի հոգևոր դասը, թեմապատկան կառույցները և ուխտավորները Հովհաննավանքում մասնակցել են միասնական ժամերգության: Թեմի առաջնորդի նախաձեռնությամբ Մեծ Պահքի ընթացքում թեմի եկեղեցիներում միասնական ժամերգություններին և պատարագներին մասնակցելը վերածվել է ավանդույթի: Արագածոտնի թեմում վերջին տարիներին ծաղկում է վանական կյանքը: Այստեղ են գտնվում Ղազարավանի կանանց մենաստանը և Կոշի Սուրբ Ստեփանոս արական վանքը:

Հայ առաքելական եկեղեցին ապրիլի 7-ին նշել է Մարիամ Աստվածածնի Ավետման տոնը


Տիրամորը նվիրված մի քանի տոն կա մեր եկեղեցական օրացույցում, Ավետման տոնը միակն է, որը հիմնված է ավետարանական պատումի վրա։ Ամենայն Հայոց Հայրապետի տնօրինությամբ՝ Ավետման տոնին, պատարագի ավարտին, կատարվել է մայրության բերկրանքին սպասող կանանց օրհնության կարգ:

 

Մուտն ի Վիրապ տոնի առիթով Գրիգոր Լուսավորիչի մասունքակիր աջը տարել են Խոր Վիրապ


Քահանաների ուղեկցությամբ ուխտավորները գնացել են Խոր Վիրապի վանք՝ մասնակցելու տոնական պատարագին եւ հաղորդակցվելու սրբի մասունքին։ Խոր Վիրապում հիշատակվում են նաև Քրիստոսի երկու աշակերտների՝ Թադեոսի և Բարդուղիմեոսի անունները, որոնք տիրոջ խոսքը քարոզելու ժամանակ հանդիպել են հենց Խոր Վիրապի հարակից տարածքում և ի նշան իրենց հանդիպման՝ խաչ են կանգնեցրել այդ տեղում:

 

Գևորգ եպիսկոպոս Սարոյանի նախաձեռնությամբ Դարբնիկ գյուղում եկեղեցի է կառուցվում


Եկեղեցին կունենա կից մատուռ, որը կծառայի նաև որպես մոմավառության սրահ, որպեսզի պատարագի ժամանակ չխանգարվի արարողությունը։ Եկեղեցին կունենա կիրակնօրյա դպրոց, հովվատուն և գրատուն, այսինքն՝ բոլոր պայմանները ստեղծվում են, որպեսզի լիարժեք հոգևոր կյանքը հնարավոր լինի կազմակերպել: Դարբնիկ գյուղն ունի ավելի քան 1800 բնակիչ, որոնք եկեղեցական արարողություններին մասնակցելու համար գնում են հարակից գյուղեր։

Արաբկիրի Հայորդյաց տունը մեկ ամիս անվճար կհյուրընկալի իրենց սաների հարազատներին


Արաբկիրի ՀՏ տնօրինությունը կանանց տոնին իրենց սաների մայրիկներին, տատիկներին, քույրերին հնարավորություն է տվել մեկ ամիս անվճար հաճախել որևէ դասարան: Ծնողների հետ կապի մեջ լինելու նպատակով գրեթե բոլոր Հայորդյաց տներում գործում են ընտանեկան ակումբներ, սպորտլանդիաներ, իրականացվում են հանդիպումներ։

 

«Tbilisi Magical Spring» միջազգային մրցույթ-փառատոնից Նորքի ՀՏ սաները վերադարձել են հաղթանակներով


Մրցույթ-փառատոնին մասնակցել են տարածաշրջանային երկրների գեղարվեստական խմբեր։ Կրկեսի նոր ձևավորված համույթի և պարային դպրոցի 5-րդ դասարանի համար սա առաջին մասնակցությունն է եղել։ Պարային դասարանը հայկական ժողովրդական և ժամանակակից պարային բեմադրություն է ներկայացրել մրցույթին և արժանացել «Լավագույն խորեոգրաֆիա և կատարում» մրցանակի:

Երիտասարդները Լուսագյուղի Սուրբ Աստվածածին եկեղեցում մասնակցել են երեկոյան ժամերգությանը


Արագածոտնի թեմի երիտասարդաց միություններն արդեն երկրորդ տարին է Մեծ Պահքն անցկացնում են պատարագներին և ժամերգություններին միասնական մասնակցությամբ, որից հետո պահոց սեղանի շուրջ զրուցում են: Հատկապես Մեծ Պահքի շրջանում երիտասարդների հարցերը շատ են։ Թեմում 19 երիտասարդաց միություն է գործում, որնցում ընդգրկված են մոտ 350 երիտասասրդներ և պատանիներ:

 

ՀԲԸՄ ֆինանսավորմամբ գործում է «Աջակցության սրճարան արցախցի տարեցների համար» ծրագիրը


Ծրագիրն իրականացվում է Երևանում և Գյումրիում. նպատակը բռնի տեղահանված 60 և բարձր տարիքի արցախցի տարեցներին սոցիալական աջակցություն տրամադրելն է: 12-շաբաթ նրանց հետ մասնագիտական թիմ է աշխատում: Խմբային միջավայրում՝ երաժշտության, արտթերապիայի, ֆիզիկական վարժությունների միջոցով մասնագետները փորձում են բարելավել տարեց արցախցիների հոգեկան առողջությունը, բարձրացնել ինքնավստահությունը և նպաստել նրանց սոցիալիզացմանը:

 

Երեկոյան ժամերգության ավարտին Սուրբ Աննա եկեղեցու բակում հավատացյալները նշել են Միջինքը


Միջինքով կիսվում է Մեծ պահքի 48-օրյա ընթացքը, որը կարճ հանգրվան է պահեցողության անցած և հաջորդող օրերի մասին մտորելու, հոգևոր վարքը, կենցաղը վերանայելու համար: Միջինքի եկեղեցական արարողություններն ավելի քիչ են, բայց դրա փոխարեն շատ են ժողովրդական սովորությունները: Մասնավորապես, երեկոյան ժամերգությունից հետո մարդիկ հավաքվում են ընթրիքի սեղանի շուրջ և կիսում բաղարջ հացը:

 

Դաունի համախտանիշով մարդկանց միջազգային օրը 6 երգիչ և «Շողակաթ» երգչախումբը ներկայացրել են տեսահոլովակ


2018 թվականից Հայաստանում գործում է «Արև երեխաներ. երեխաների առողջության և զարգացման կենտրոն» ՀԿ-ը: Տեր Գրիգոր քահանա Գրիգորյանի նախաձեռնությամբ է ստեղծվել կենտրոնը, ուր հաճախում է ավելի քան 220 երեխա: Մասնագետների մեծ խումբ է աշխատում կենտրոնում՝ երեխաների խմբային և անհատական ներգրավվածությամբ: Խոսքի զարգացումից մինչև սոցիալիզացում յուրաքանչյուր փոքր հաջողությանը նախորդել է տարիների ամենօրյա հետևողական աշխատանքը: Կենտրոնի մասնագետներն աշխատում են նաև երեխաների ծնողների հետ:

 

Պահքը հնարավորություն է տալիս կենտրոնանալու կյանքի ընթացքի վրա․ Տեր Վահրամ քահանա Մելիքյան


Տեր Վահրամ քահանա Մելիքյանը համարում է, որ պահքը ունի առանձնահատուկ նշանակություն։ Այն առիթ է ընձեռում ինքնասևեռվելու, կենտրոնանալու իր կյանքի ընթացքի վրա։ Ըստ նրա՝ հոգևորականը բացի իր առօրյա շփումներից մեծ պատասխանատվություն է կրում Աստծո և ժողովրդի առաջ, ունի բազում այցելուներ, որոնք դիմում են խնդիրներով, ցավերով։ Նա կարծում է, որ հոգևորականը նույնպես կարիք ունի այդ ամենի միջով անցնելու և կարողանալու ճիշտ ներքին դիրքորոշումներ, կեցվածքներ ընդունելու։