Համբարձման տոնը երիտասարդները Թումոյի այգում նշել են ազգային երգ ու պարով


Սուրբ պատարագից հետո երիտասարդները տոնը շարունակել են ազգային երգ ու պարով, ժողովրդական խաղերով՝ հյուսել են ծաղկեպսակներ և վիճակ են գցել։ Միջոցառմանը հանդես է եկել Ռուդիկ Հարոյանի անվան «Մասունք» ավանդական երգի-պարի համույթը: Երիտասարդները ներկաներին տոնի ուտեստներ են հյուրասիրել՝ կաթնապուր, գաթա։

 

Գրիգոր Լուսավորիչ եկեղեցում կազմակերպվել է «Հանձնիր արյուն, փրկիր կյանք» խորագրով ակցիա


Յոլյանի անվան արյունաբանության և ուռուցքաբանության կենտրոնի Արյան ծառայության անձնակազմը Սուրբ Գրիգոր Լուսավորիչ Մայր եկեղեցում դոնորներից արյուն է վերցրել։ Նրանց եկեղեցում դիմավորել են «Լուսավորիչ» միության երիտասարդները, որոնք մինչև օրվա վերջ անվարձահատույց համակարգել են աշխատանքը։ Հայաստանում մշտապես կա արյան դոնորների կարիքը։ Մեկ դոնորը կարող է փրկել 3 կյանք:

 

Համբարձման տոնին Ծաղկեվանքում Տոնական պատարագ է մատուցվել


Համբարձման տոնին Ծաղկեվանքի ուխտի օրն է: Ուխտավորների մի մասը պատարագին մասնակցել է դրսում՝ աստիճաններին կամ քարերին նստած: Տոնական պատարագը մատուցել է Տեր Արամ քահանա Ասատրյանը: Արա Լեռան լանջին գտնվող ժայռափոր վանքում ամբողջ տարին ջուր է կաթում։ Ուխտավորներն այդ ջուրը հավաքում են եւ տանում հիվանդներին բժշկելու համար։

 

Գարեգին Երկրորդն ընդունել է վերապատրաստման դասընթացի մասնակից քահանաներին


Ամենայն Հայոց Կաթողիկոսն ընդունել է եկեղեցականների վերապատրաստման դասընթացներին մասնակցած հոգևորականների 19-րդ խմբի անդամներին: 2023-ից Հայաստանի և Սփյուռքի թեմերից ժամանած շուրջ 400 հոգևորականներ «Գարեգին Ա» կրթական կենտրոնում մասնակցել են երեքշաբաթյա դասընթացներին, հոգևոր կյանքին վերաբերող արդի թեմաների ուսումնասիրությունից ու քննարկումներից զատ հոգևորականները 3 շաբաթ շարունակ հնարավորություն են ունեցել ապրել միաբանական կյանքով, մասնակցել ժամերգություններին, նորոգել իրենց ուխտն ու զորանալ Մայր Աթոռից բխող օրհնությամբ։

 

«Հայաստանի մշակութային ժառանգության պահպանման ասոցիացիան» ծառատունկ է կատարել


Անցած տարի կառուցված Տարոնիկ գյուղի Սուրբ Զորաց մատուռի հարակից Հերոսների այգում «Հայաստանի մշակութային ժառանգության պահպանման ասոցիացիան» ծառատունկ է կատարել: Ծրագրով նախատեսվում է կանաչապատ գոտիներ ստեղծել Հայորդյաց տների և Սարդարապատի հուշահամալիրի տարածքներում:

 

Արցախի թեմի «Ընծա» սոցիալ-հոգևոր-հոգեբանական կենտրոնը աջակցում է արցախցիներին


Վերաբացվելով Երևանում՝ Արցախի թեմի «Ընծա» սոցիալ-հոգևոր-հոգեբանական կենտրոնի աջակցությունն արցախցիներին շարունակվում է: Գործընկեր կառույցների հետ համագործակցաբար՝ կենտրոնը թիրախային տարբեր խմբերի համար պարբերաբար նոր նախագծեր է կյանքի կոչում: Այժմ կենտրոնում «Սրբադասված բժիշկներ» խորագրի ներքո գեղարվեստական ֆիլմեր են ցուցադրվում բժշկական ոլորտը ներկայացնող արցախցիների համար:

 

Սուրբ Հովհաննես Ավետարանիչ եկեղեցու լուսարարարապետը տնօրհնեքի կարգ է կատարել


Արտաշատի Սուրբ Հովհաննես Ավետարանիչ եկեղեցու լուսարարարապետ Տեր Պողոս քահանա Միքայելյանը տնօրհնեքի կարգ է կատարել: Օրհնվել են ընտանիքի անդամները, տան բերքն ու բարիքը: Տնօրհնեք կատարվում է Սուրբ Ծննդյան և Հարության տոներին հաջորդող շրջանում, բնակարանամուտին, ընտանիքում անհաշտության դեպքում կամ ցանկացած ժամանակ, երբ մարդիկ ուզում են սեփական հարկը օրհնությամբ լցնել:

Վերջին զանգը Էօրնեկյան դպրոցում. աղոթք, օրհներգ եւ նոր սկիզբ


Վերջին զանգը Էօրնեկյան դպրոցում. աղոթք, օրհներգ եւ նոր սկիզբ Մայր Աթոռ Սուրբ Էջմիածնի հովանու ներքո գործող Էօրնեկյան հանրակրթական դպրոցի շրջանավարտները նշել են վերջին զանգը։ Արարողությունը սկսվել է աղոթքով ու դպրոցի օրհներգի հնչյուններով։ Շրջանավարտները կարեւոր են համարել դպրոցի դերը իրենց մասնագիտական կողմնորոշման գործում։ Էօրնեկեան հանրակրթական դպրոցը հիմնադրել է Գարեգին Բ Ամենայն Հայոց Կաթողիկոսը: Դպրոցի շենքը կառուցվել է արգենտինահայ գործարար և բարերար Էդուարդո Էօրնեկեանի հովանավորությամբ և կրում է նրա անունը:

 

Հայ օգնության ֆոնդը 16 դրամաշնորհ է տրամադրել Հայաստանի գիտնականներին


Յուրաքանչյուր գիտական խումբ 7500 դոլար է ստացել: Գիտնականները հետազոտություններ կանցկացնեն ֆիզիկայի, կենսատեխնոլոգիայի, կենսաբանության, նանոտեխնոլոգիայի, նյութագիտության, կենդանաբանության, կենսաքիմիայի, հասարակական գիտությունների և պատմության ոլորտներում: Անցած 25 տարիների ընթացքում հիմնադրամի հետազոտական խորհրդին ներկայացվել է 3566 դիմում-առաջարկ: Դրամաշնորհներ են ստացել 622 գիտական խմբեր:

 

Տեր Մարկոս քահանա Մանգասարյանի բանախոսությունը «Բարձունք» հկ-ում


Տեր Մարկոս քահանա Մանգասարյանը «Բարձունք» հկ-ում ներկայացրել է ամուսնալուծության, ծնողական խնամքի բացակայության, թվային կախվածության, էմոցիոնալ կապի խզման, աշխանքային գերծանրաբեռնվածության, միջսերնդային կոնֆլիկտների, սեռական խնդիրների, ընտանիքների վրա պատերազմի և տեղահանությունների ազդեցության և քրիստոնեական արժեհամակարգի վերաբերյալ հայ առաքելական եկեղեցու առաջարկած լուծումները:

Նոր նմուշներով Պատմության թանգարանում վերաբացվել է «Հայաստանը 15-18-րդ դարերում» հատվածը


Ցուցադրության սկզբում 15-րդ դարում Կիլիկիայի Սիս քաղաքից Սուրբ Էջմիածին կաթողիկոսական աթոռի վերահաստատման պատմությունն է: Ներկայացված է Տաթևի վանքի Սուրբ Գրիգոր Լուսավորիչ եկեղեցու դուռը՝ ստեղծված 1614 թվականին, դրվագված խաչքարային հորինվածքով: Թանգարան է բերվել 1931-ին: 1448-ին Սևանավանքում տեղադրված թևավոր խաչն է, կողքին Սևանի Առաքելոց եկեղեցու դռներից մեկը: Դարձյալ ստեղծվել է 15-րդ դարում: Միափեղկ դռան վրա տերունական տեսարաններ են քանդակված:

 

Կոմիտասի թանգարան-ինստիտոուտում ելույթ են ունեցել «Գեղարդ» և «Շողակաթ» մանկական երգչախումբը


Կոմիտասի թանգարան-ինստիտոուտում բացի մշտական և ժամանակավոր ցուցադրություններից՝ կազմակերպվել է նաև Կոմիտաս վարդապետին նվիրված տարիքային տարբեր խմբերի համար նախատեսված թեմատիկ և կրթական ծրագրեր ու հանդիպումներ: Ելույթ են ունեցել «Գեղարդ» երգեցիկ խումբը և Նորքի Հայորդյաց տան «Շողակաթ» մանկական երգչախումբը: Թանգարանների միջազգային օրը ավանդաբար «Գեղարդը» ելեւյթ է ունենում Կոմիտասի տուն-թանգարանում։ «Շողակաթ» մանկական երգչախումբը կատարել է բազմաժանր և բազմալեզու ստեղծագործություններ: Այս տարի թանգարանը նշում է հիմնադրման 10 և Կոմիտասի մահվան 90-ամյակը: